ഇന്ത്യൻ വ്യോമസേനയുടെ സുഖോയ് 30എംകെഐ യും മിറാഷ്-2000 വിമാനവും ശനിയാഴ്ച മധ്യപ്രദേശിലെ മൊറേന ജില്ലയിൽ പതിവ് പരിശീലന ദൗത്യത്തിനിടെ തകർന്നുവീണ് ഒരു പൈലറ്റ് കൊല്ലപ്പെടുകയും രണ്ട് പേർക്ക് പരിക്കേൽക്കുകയും ചെയ്തു.
സുഖോയ്- വിമാനത്തിലെ രണ്ട് പൈലറ്റുമാർ സുരക്ഷിതമായി പുറത്തേക്ക് വന്നപ്പോൾ മിറാഷ്-2000ന്റെ പൈലറ്റിന് ജീവൻ നഷ്ടപ്പെട്ടതായി അധികൃതർ അറിയിച്ചു.

ഇന്ന് രാവിലെ ഗ്വാളിയോറിന് സമീപം വ്യോമസേനയുടെ രണ്ട് യുദ്ധവിമാനങ്ങൾ അപകടത്തിൽ പെട്ടതായി ഇന്ത്യൻ വ്യോമസേന (ഐഎഎഫ്) പ്രസ്താവനയിൽ പറഞ്ഞു.

വിമാനം ഒരു പതിവ്  പറക്കൽ പരിശീലന ദൗത്യത്തിലായിരുന്നു.  “ഉൾപ്പെട്ട മൂന്ന് പൈലറ്റുമാരിൽ ഒരാൾക്ക് മാരകമായ പരിക്കേറ്റു. അപകടത്തിന്റെ കാരണം കണ്ടെത്താൻ അന്വേഷണത്തിന് ഉത്തരവിട്ടിട്ടുണ്ട്,” ഐഎഎഫ് അറിയിച്ചു.

രണ്ട് വിമാനങ്ങളുടെയും അവശിഷ്ടങ്ങൾ ജില്ലയിലെ പഹാർഗഡ് മേഖലയിൽ വീണതായി മൊറേന ജില്ലാ കളക്ടർ അങ്കിത് അസ്താന പറഞ്ഞു.  മധ്യപ്രദേശുമായി അതിർത്തി പങ്കിടുന്ന രാജസ്ഥാനിലെ ഭരത്പൂർ മേഖലയിലും ചില അവശിഷ്ടങ്ങൾ വീണു, അദ്ദേഹം കൂട്ടിച്ചേർത്തു.

ഐഎഎഫ് താവളമായി പ്രവർത്തിക്കുന്ന ഗ്വാളിയോർ വിമാനത്താവളത്തിൽ നിന്നാണ് രണ്ട് യുദ്ധവിമാനങ്ങളും പറന്നതെന്ന് ഉദ്യോഗസ്ഥർ പറഞ്ഞു.

രണ്ട് ഐഎഎഫ് വിമാനങ്ങൾ തകർന്നതിനെ കുറിച്ച് പ്രതിരോധ മന്ത്രി രാജ്‌നാഥ് സിംഗിനെ വ്യോമസേനാ മേധാവി എയർ ചീഫ് മാർഷൽ വി ആർ ചൗധരി അറിയിച്ചതായി പ്രതിരോധ മന്ത്രാലയ വൃത്തങ്ങൾ അറിയിച്ചു.

സിംഗ് സംഭവവികാസങ്ങൾ സൂക്ഷ്മമായി നിരീക്ഷിച്ചു വരികയാണെന്നും വൃത്തങ്ങൾ അറിയിച്ചു.

വ്യോമസേനയുടെ സുഖോയ്-30, മിറാഷ്-2000 വിമാനങ്ങൾ മൊറേനയിലെ കൊളാറസിനു സമീപം തകർന്നു വീണ വാർത്ത വളരെ ദുഃഖകരമാണെന്ന് മധ്യപ്രദേശ് മുഖ്യമന്ത്രി ശിവരാജ് സിങ് ചൗഹാൻ ട്വീറ്റ് ചെയ്തു.

വേഗത്തിലുള്ള രക്ഷാപ്രവർത്തനങ്ങളിലും ദുരിതാശ്വാസ പ്രവർത്തനങ്ങളിലും വ്യോമസേനയുമായി സഹകരിക്കാൻ പ്രാദേശിക ഭരണകൂടത്തിന് നിർദ്ദേശം നൽകിയിട്ടുണ്ട്.വിമാനങ്ങളിലെ പൈലറ്റുമാർ സുരക്ഷിതരായിരിക്കാൻ ദൈവത്തോട് പ്രാർത്ഥിക്കുന്നു,” അദ്ദേഹം പറഞ്ഞു.