വിഴിഞ്ഞം അന്താരാഷ്ട്ര തുറമുഖത്തിന്റെ ചരിത്രത്തിലെ സുപ്രധാന നാഴികക്കല്ല് രേഖപെടുത്തി ചൈനയിൽ നിന്നുള്ള ക്രെയിനുകളുമായി ആദ്യ കപ്പൽ വ്യാഴാഴ്ച വിഴിഞ്ഞം തുറമുഖത്തെത്തി.
7,700 കോടി രൂപ മുതൽ മുടക്കിൽ നിർമ്മിച്ച തുറമുഖത്തേക്ക് കപ്പൽ വലിച്ച് കയറ്റിയ ടഗ് ബോട്ടുകൾ ജെൻ ഹുവ 15 എന്ന കപ്പലിന് വാട്ടർ സല്യൂട്ട് നൽകി. ഒക്ടോബർ 15 ഞായറാഴ്ച കേന്ദ്ര തുറമുഖ മന്ത്രി സർബാനന്ദ സോനോവാളും കേരള മുഖ്യമന്ത്രി പിണറായി വിജയനും പങ്കെടുക്കുന്ന ഔദ്യോഗിക പരിപാടിയിൽ കപ്പലിലെ കണ്ടെയ്‌നർ കൈകാര്യം ചെയ്യുന്ന ക്രെയിനുകൾ തുറമുഖത്തേക്ക് മാറ്റും.
ഓഗസ്റ്റ് അവസാനം ചൈനയിൽ നിന്ന് യാത്ര ആരംഭിച്ച കപ്പൽ ഒക്ടോബർ 4 ന് വിഴിഞ്ഞത്ത് ഡോക്ക് ചെയ്യാൻ നിശ്ചയിച്ചിരുന്നെങ്കിലും മോശം കാലാവസ്ഥ കാരണം യാത്ര വൈകി. ആദ്യം ഗുജറാത്തിലെ മുന്ദ്ര തുറമുഖത്ത് ക്രെയിനുകൾ ഇറക്കാൻ പോയ ശേഷം വിഴിഞ്ഞം ലക്ഷ്യമാക്കി നീങ്ങി.
അടുത്ത വർഷം മെയ് മാസത്തോടെ കമ്മീഷൻ ചെയ്യുമെന്ന് പ്രതീക്ഷിക്കുന്ന തുറമുഖത്തേക്ക് ഒക്ടോബർ, നവംബർ മാസങ്ങളിൽ മൂന്ന് കപ്പലുകൾ കൂടി എത്തുമെന്ന് കേരള സർക്കാർ കഴിഞ്ഞ മാസം അറിയിച്ചിരുന്നു. ബ്രേക്ക് വാട്ടർ നിർമാണത്തിന്റെ 75 ശതമാനവും പൂർത്തിയായതായും സർക്കാർ അറിയിച്ചു
പൊതു-സ്വകാര്യ പങ്കാളിത്ത മാതൃകയിലാണ് വിഴിഞ്ഞം തുറമുഖം നിർമിക്കുന്നത്. കമ്മീഷൻ ചെയ്താൽ ലോകത്തിലെ ഏറ്റവും വലിയ തുറമുഖങ്ങളിലൊന്നായി മാറാൻ പോകുന്ന വിഴിഞ്ഞം തുറമുഖ നിർമ്മാണത്തിൻ്റെ സ്വകാര്യ പങ്കാളിയാണ് അദാനി ഗ്രൂപ്പ്.
2019ൽ കമ്മീഷൻ ചെയ്യാനിരുന്ന പദ്ധതി ഭൂമി ഏറ്റെടുക്കലുമായി ബന്ധപ്പെട്ട നിരവധി പ്രശ്നങ്ങളും പ്രദേശത്തെ മത്സ്യത്തൊഴിലാളികളുടെ പ്രതിഷേധവും കാരണം വൈകുകയായിരുന്നു. തുറമുഖത്തിന്റെ നിർമ്മാണത്തിനും പ്രവർത്തനത്തിനും ചുറ്റുമുള്ള പരിസ്ഥിതി ആശങ്കകളും ഉണ്ട്.
