ഒഴിഞ്ഞ പ്ലാസ്റ്റിക് മദ്യക്കുപ്പികൾ തിരികെ സ്വീകരിക്കുന്ന ബിവറേജസ് കോർപ്പറേഷന്റെ (ബെവ്‌കോ) പരീക്ഷണ പദ്ധതി മികച്ച വിജയം കൈവരിച്ചു. പരീക്ഷണാടിസ്ഥാനത്തിൽ പദ്ധതി നടപ്പാക്കിയ കണ്ണൂർ, തിരുവനന്തപുരം ജില്ലകളിലെ ബെവ്‌കോ ഔട്ട്‌ലെറ്റുകളിൽ കഴിഞ്ഞ മൂന്ന് മാസത്തിനിടെ 33,17,228 പ്ലാസ്റ്റിക് മദ്യക്കുപ്പികൾ തിരിച്ചെത്തി.

ഏകദേശം 80 ടണ്ണിലധികം തൂക്കം വരുന്ന ഈ കുപ്പികൾ പുനർസംസ്‌കരണത്തിനായി ക്ലീൻ കേരള കമ്പനിയാണ് ശേഖരിച്ചത്.

ജലാശയങ്ങളിലടക്കം പ്ലാസ്റ്റിക് മാലിന്യങ്ങൾ കൂട്ടംകൂടുന്നത് തടയുക എന്ന ലക്ഷ്യത്തോടെയാണ് പദ്ധതി നടപ്പാക്കിയത്. കണ്ണൂർ, തിരുവനന്തപുരം ജില്ലകളിലെ തെരഞ്ഞെടുത്ത പത്ത് വീതം ഔട്ട്‌ലെറ്റുകളിലാണ് ബെവ്‌കോ പദ്ധതിക്ക് തുടക്കമിട്ടത്.

2024 സെപ്റ്റംബർ 15 മുതൽ ഡിസംബർ 10 വരെ കണ്ണൂരിലെ ഔട്ട്‌ലെറ്റുകളിൽ നിന്ന് 15,86,833 കുപ്പികൾ (38,835.16 കിലോ) തിരിച്ചെത്തി. തിരുവനന്തപുരത്ത് 17,30,395 കുപ്പികൾ (42,028.34 കിലോ) മടങ്ങിയെത്തി. കണ്ണൂരിൽ ഏറ്റവും കൂടുതൽ കുപ്പികൾ തിരികെ ലഭിച്ചത് പയ്യന്നൂർ ഔട്ട്‌ലെറ്റിലായിരുന്നു—5,585.8 കിലോ. തിരുവനന്തപുരത്ത് മുക്കോല ഔട്ട്‌ലെറ്റിലാണ് ഏറ്റവും കൂടുതൽ—6,101.14 കിലോ—കുപ്പികൾ തിരിച്ചെത്തിയത്.

തിരഞ്ഞെടുത്ത ഔട്ട്‌ലെറ്റുകളിലൂടെ വിൽക്കുന്ന പ്ലാസ്റ്റിക് മദ്യക്കുപ്പികളിൽ 20 രൂപ അധികമായി ഈടാക്കി, പ്രത്യേക ക്യൂആർ കോഡ് പതിപ്പിച്ചാണ് വിൽപ്പന നടത്തിയത്. പിന്നീട് ഈ ക്യൂആർ കോഡ് പതിച്ച കാലിക്കുപ്പികൾ അതേ ഔട്ട്‌ലെറ്റിൽ തിരികെ നൽകിയാൽ ഉപഭോക്താവിന് 20 രൂപ തിരിച്ചുനൽകുന്ന സംവിധാനമാണ് ഏർപ്പെടുത്തിയിരുന്നത്. ഈ രീതിയിൽ, മേൽപ്പറഞ്ഞ കാലയളവിൽ 6.63 കോടി രൂപ ബെവ്‌കോ ഉപഭോക്താക്കൾക്ക് തിരികെ നൽകിയതായി കണക്കുകൾ പറയുന്നു.

പരീക്ഷണ പദ്ധതി വിജയിച്ചതിനെ തുടർന്ന് മറ്റ് ജില്ലകളിലേക്കും ഇത് വ്യാപിപ്പിക്കുന്നതിനുള്ള ആലോചനയിലാണ് ബെവ്‌കോ. സംസ്ഥാനത്തെ 284 ബെവ്‌കോ ഔട്ട്‌ലെറ്റുകൾ വഴി പ്രതിവർഷം ശരാശരി 51 കോടി വിദേശമദ്യ കുപ്പികൾ വിൽക്കപ്പെടുന്നുവെന്നാണ് കണക്കുകൾ.