ഭാര്യയെ കത്തി കൊണ്ട് കുത്തി, ശരീരത്തിന് മുകളിലൂടെ വാഹനമോടിച്ച് കൊലപ്പെടുത്തിയതിനു അമേരിക്കയിൽ ഇന്ത്യക്കാരന് ജീവപര്യന്തം തടവ് ശിക്ഷ.

  കൊലപാതകത്തിനും മാരകായുധം കൊണ്ടുള്ള ആക്രമണത്തിനും കുറ്റസമ്മതം നടത്തിയതിന് ശേഷം 2023 നവംബർ 3 വെള്ളിയാഴ്ച ഫ്ലോറിഡയിലെ  കോടതി ചങ്ങനാശ്ശേരി സ്വദേശി ഫിലിപ്പ് മാത്യുവിനെ ശിക്ഷിച്ചു.

 2020ൽ ജോലിക്ക് പോകുന്നതിനിടെ കാർ തടഞ്ഞ് ഭാര്യ മെറിൻ ജോയിയെ മാത്യു 17 തവണ കുത്തി.  സംഭവസ്ഥലത്ത് നിന്ന് രക്ഷപ്പെടുന്നതിന് മുമ്പ് അയാൾ അവളുടെ ശരീരത്തിന് മുകളിലൂടെ കാർ ഓടിച്ചു.

 കോട്ടയം മോനിപ്പള്ളിയിൽ നിന്നുള്ള 26 വയസ്സ്ക്കാരിയായ മെറിൻ ജോയ്  ആശുപത്രിയിൽ നഴ്‌സായിരുന്നു.   

  കുറ്റം സമ്മതിക്കാനുമുള്ള മാത്യുവിന്റെ തീരുമാനം കൂടുതൽ കഠിനമായ ശിക്ഷയിൽ നിന്ന് അദ്ദേഹത്തെ ഒഴിവാക്കിയതായി സ്റ്റേറ്റ് അറ്റോർണി ഓഫീസ് പ്രസ്താവനയിൽ പറഞ്ഞു.

  കേസിൽ അപ്പീൽ നൽകേണ്ടതില്ലെന്ന പ്രതിയുടെ തീരുമാനം കാരണമാണ് ഞങ്ങൾ വധശിക്ഷ ഒഴിവാക്കാനുള്ള തീരുമാനമെടുത്തതെന്ന് ഓഫീസിന്റെ വക്താവ് പോള മക്മഹോൺ പറഞ്ഞു.

 ഫിലിപ്പ് മാത്യുവിന് പരോളില്ലാത്ത ജീവപര്യന്തമാണ്  കോടതി വിധിച്ചിട്ടുള്ളത്. അമേരിക്കയിൽ ജീവപര്യന്തം എന്നാൽ മരണം വരെ എന്നാണ്. 

കൊലയ്ക്കു ശേഷം സ്വയം കുത്തി മുറിവേൽപിച്ചു മരിക്കാൻ ഫിലിപ് മാത്യു ശ്രമിച്ചിരുന്നു. ഇരുവരും പിരിഞ്ഞു താമസിക്കുന്നതിനിടെയാണു മെറിനെ ഫിലിപ് കൊലപ്പെടുത്തിയത്.

മെറിൻ കൊല്ലപ്പെടുമ്പോൾ ഏകമകൾ നോറയ്ക്ക് രണ്ടുവയസ്സായിരുന്നു. മകൾ ഇപ്പോൾ മെറിന്റെ മാതാപിതാക്കളായ മേഴ്സിക്കും ജോയിക്കുമൊപ്പമാണ്.