ബംഗളൂരുവിലെ കെംപഗൗഡ അന്താരാഷ്ട്ര വിമാനത്താവളത്തിൽ  ബോംബ് ഭീഷണി സൃഷ്ടിച്ചുവെന്നാരോപിച്ച് കേരള സ്വദേശിനിയെ വെള്ളിയാഴ്ച ബെംഗളൂരുവിൽ അറസ്റ്റ് ചെയ്തതായി പോലീസ് അറിയിച്ചു.

കൊൽക്കത്തയിലേക്കുള്ള വിമാനം ലഭിക്കാത്തതിൽ ആണ് അങ്ങനെ ചെയ്തതെന്ന് അന്വേഷണത്തിൽ കണ്ടെത്തി.

കോഴിക്കോട് സ്വദേശിയായ യുവതിയെ  തിരിച്ചറിഞ്ഞതായി ഉദ്യോഗസ്ഥർ പറഞ്ഞു.  വിമാനത്താവളത്തിൽ ഡ്യൂട്ടിയിലുണ്ടായിരുന്ന സിഐഎസ്‌എഫ് ഉദ്യോഗസ്ഥൻ സന്ദീപ് സിംഗ് ബാംഗ്ലൂർ ഇന്റർനാഷണൽ എയർപോർട്ട് ലിമിറ്റഡ് (ബിഐഎഎൽ) പോലീസിൽ പരാതി നൽകിയതിനെ തുടർന്നാണ് പോലീസ് ഇവരെ അറസ്റ്റ് ചെയ്തത്.

അന്വേഷകർ പറയുന്നതനുസരിച്ച്, സിംഗ് ബോർഡിംഗ് ഗേറ്റ് നമ്പർ 6 ൽ രാവിലത്തെ  ഷിഫ്റ്റിൽ ജോലി ചെയ്യുമ്പോൾ രാവിലെ 8.20 ഓടെ യുവതി ഗേറ്റിനടുത്തേക്ക് ഓടി വന്ന്  കൊൽക്കത്തയിലേക്ക് പുറപ്പെടേണ്ട ഇൻഡിഗോ വിമാനത്തിൽ തനിക്ക് അടിയന്തിരമായി കയറണമെന്ന് പറഞ്ഞു.  വിമാനത്തിൽ കയറാൻ അനുവദിച്ചില്ലെങ്കിൽ വിമാനത്താവളം ബോംബ് വച്ച്  തകർക്കുമെന്ന് യുവതി ഭീഷണിപ്പെടുത്തി.

സിംഗ് അവളെ സമാധാനിപ്പിക്കാൻ ശ്രമിക്കുന്നതിനിടെ അവൾ കോളറിൽ പിടിച്ച് മർദിക്കുകയായിരുന്നുവെന്ന് ഉദ്യോഗസ്ഥർ പറഞ്ഞു.  തുടർന്ന് യുവതി ബോർഡിംഗ് ഗേറ്റ് നമ്പർ 6 ലേക്ക് പോയി, അവിടെ ബോംബ് വച്ചിട്ടുണ്ടെന്ന് പറഞ്ഞ് യാത്രക്കാരോട് ആക്രോശിക്കുകയും ജീവൻ രക്ഷിക്കാൻ ഓടിപ്പോകാൻ ആവശ്യപ്പെടുകയും ചെയ്തുവെന്ന് ഒരു പോലീസ് ഉദ്യോഗസ്ഥൻ പറഞ്ഞു.

യുവതിയെ കസ്റ്റഡിയിലെടുക്കുകയും ഇന്ത്യൻ ശിക്ഷാ നിയമത്തിലെ 505, 323, 353 വകുപ്പുകൾ പ്രകാരം ബിഐഎഎൽ പോലീസ് കേസ് രജിസ്റ്റർ ചെയ്യുകയും ചെയ്തു.