ഇടുക്കി: ഷവർമ കഴിച്ച് ഒരു കുടുംബത്തിലെ മൂന്ന് പേർക്ക് ഭക്ഷ്യവിഷബാധയേറ്റു.
നെടുങ്കണ്ടത്തെ അച്ഛനും വയോധികയും ഏഴുവയസ്സുള്ള കുട്ടിയും ദേഹാസ്വാസ്ഥ്യം അനുഭവപ്പെട്ടു. വയറിളക്കവും പനിയും ഛർദ്ദിയും അനുഭവപ്പെട്ട ഇവർ ആശുപത്രിയിൽ ചികിത്സയിലാണ്.
മൂന്ന് പേരുടെയും ആരോഗ്യനില തൃപ്തികരമാണെന്ന് ആശുപത്രി അധികൃതർ അറിയിച്ചു. ഈ മാസം ഒന്നാം തീയതി നെടുങ്കണ്ടത്തെ ‘കാമൽ റെസ്റ്റോ’ ഹോട്ടലിൽ നിന്നാണ് ഷവർമ വാങ്ങിയതെന്ന് കുടുംബം പറഞ്ഞു.
വീട്ടുകാരുടെ പരാതിയിൽ ഭക്ഷ്യസുരക്ഷാ വിഭാഗം ഹോട്ടലിൽ പരിശോധന നടത്തി. പരിസരം വൃത്തിഹീനമാണെന്ന് കണ്ടെത്തിയതിനെ തുടർന്ന് ഹോട്ടൽ അടച്ചുപൂട്ടാൻ നോട്ടീസ് നൽകിയിട്ടുണ്ട്. ഭക്ഷ്യവിഷബാധയേറ്റ് ചികിത്സയിലായിരുന്ന കാസർകോട് സ്വദേശിനിയായ യുവതി ഇന്ന് രാവിലെയാണ് മരിച്ചത്. ഹോട്ടലിൽ നിന്ന് വാങ്ങിയ ‘കുഴിമന്തി’ കഴിച്ചതോടെ പെൺകുട്ടിക്ക് അസ്വസ്ഥത അനുഭവപ്പെട്ടു.
കഴിഞ്ഞ തിങ്കളാഴ്ച കോട്ടയത്ത് അൽഫഹാം കഴിച്ച് ഭക്ഷ്യവിഷബാധയേറ്റ് നഴ്‌സ് മരിച്ചിരുന്നു. ഇതിന് പിന്നാലെ സംസ്ഥാനത്തെ ഹോട്ടലുകളിൽ ഭക്ഷ്യസുരക്ഷാ വിഭാഗം വ്യാപക റെയ്ഡ് നടത്തുകയായിരുന്നു.
