ന്യൂഡൽഹി: തേജസ്, വന്ദേ ഭാരത്, ഹംസഫർ ട്രെയിനുകളിൽ കേന്ദ്ര സർക്കാർ ജീവനക്കാർക്ക് ലീവ് ട്രാവൽ കൺസഷൻ ഉപയോഗിച്ച് (LTC) യാത്ര ചെയ്യുന്നതിനുള്ള അനുമതി കേന്ദ്ര സർക്കാർ നൽകി. ഡിപ്പാർട്ട്‌മെന്റ് ഓഫ് പേഴ്‌സണൽ ആൻഡ് ട്രെയിനിംഗ് (DoPT) പുറത്തിറക്കിയ ഔദ്യോഗിക ഉത്തരവിലാണ് പുതിയ മാറ്റം കൊണ്ടുവന്നത്.
പുതിയ ഉത്തരവിന്റെ അടിസ്ഥാനത്തിൽ, നിലവിൽ അനുവദിച്ചിരുന്ന രാജധാനി, ഷതാബ്ദി, ദുരന്തോ ട്രെയിനുകൾക്കു പുറമെ, തേജസ് എക്‌സ്‌പ്രസ്, വന്ദേ ഭാരത് എക്‌സ്‌പ്രസ്, ഹംസഫർ എക്‌സ്‌പ്രസ് ട്രെയിനുകളിലും എൽടിസി പ്രകാരം യാത്ര ചെയ്യാൻ ഇനി അനുവദിക്കുമെന്ന് ഉത്തരവിൽ പറയുന്നു.
പുതിയ തീരുമാനം ജനുവരി 14, 2025 ചൊവ്വാഴ്ചയാണ് ഡിഓപിടി പുറത്തിറക്കിയത്. വിവിധ ഓഫിസുകളും വ്യക്തികളും എൽടിസി-യുമായി ബന്ധപ്പെട്ടുള്ള ട്രെയിൻ സേവനങ്ങളെക്കുറിച്ചുള്ള ആശങ്കകൾ ഉന്നയിച്ചതിനെ തുടർന്നാണ് പുതിയ നയമെന്ന് റിപ്പോർട്ട് ചെയ്യുന്നു.
എല്ലാ യോഗ്യരായ കേന്ദ്ര സർക്കാർ ജീവനക്കാർക്കും യാത്രാ ടിക്കറ്റ് ചെലവിന്റെ തുക (ഇരു ദിശയിലും ഉള്ളത്) ആനുകൂല്യമായി ലഭിക്കും. കൂടാതെ, എൽടിസി ഉപയോഗിക്കുന്ന സമയത്ത് ശമ്പളത്തോടുള്ള അവധിയും ലഭിക്കും.
