ഷോപിയാൻ ജില്ലയിലെ ഇടതൂർന്ന ഷൂക്കൽ കെല്ലർ വനമേഖലയിൽ “ഓപ്പറേഷൻ കെല്ലർ” എന്ന സൈനിക നടപടിയിൽ ഒരു ഉന്നത കമാൻഡർ ഉൾപ്പെടെ മൂന്ന് ലഷ്കർ-ഇ-തൊയ്ബ (എൽഇടി) തീവ്രവാദികൾ കൊല്ലപ്പെട്ടു.
മേഖലയിലെ തീവ്രവാദികളുടെ സാന്നിധ്യത്തെക്കുറിച്ച് രാഷ്ട്രീയ റൈഫിൾസിൽ നിന്നുള്ള പ്രത്യേക രഹസ്യാന്വേഷണ വിവരങ്ങളുടെ അടിസ്ഥാനത്തിലാണ് ഇന്ത്യൻ സൈന്യം, ജമ്മു കശ്മീർ പോലീസ്, സിആർപിഎഫ്, രഹസ്യാന്വേഷണ ഏജൻസികൾ എന്നിവ സംയുക്തമായി സൈനിക നീക്കം നടത്തിയത്
കൊല്ലപ്പെട്ടവരിൽ ‘എ’ വിഭാഗം ലഷ്കർ കമാൻഡറായ ഷാഹിദ് കുട്ടായ്, ഷോപിയാനിൽ നിന്നുള്ള തദ്ദേശവാസികളായ അദ്‌നാൻ ഷാഫി ദാർ എന്നിവരും ഉൾപ്പെടുന്നു. മൂന്നാമന്റെ തിരിച്ചറിയൽ നടപടികൾ പുരോഗമിക്കുകയാണ്. താഴ്‌വരയിൽ അടുത്തിടെയുണ്ടായ ആക്രമണങ്ങളുമായി ബന്ധമുള്ളവരും നിരവധി ഭീകരവാദ പ്രവർത്തനങ്ങളിൽ ഏർപ്പെട്ടവരുമാണ് കൊല്ലപ്പെട്ട തീവ്രവാദികൾ.
ഏറ്റുമുട്ടലിനുശേഷം, സുരക്ഷാ സേന എകെ-സീരീസ് റൈഫിളുകൾ, ഗ്രനേഡുകൾ, നൂറുകണക്കിന് റൗണ്ട് വെടിയുണ്ടകൾ, എന്നിവയുൾപ്പെടെ ആയുധങ്ങളുടെയും വെടിക്കോപ്പുകളുടെയും ഒരു പ്രധാന ശേഖരം കണ്ടെടുത്തു.അതിർത്തിക്കപ്പുറത്തുള്ള ഭീകര അടിസ്ഥാന സൗകര്യങ്ങൾ ലക്ഷ്യമിട്ടുള്ള ഓപ്പറേഷൻ സിന്ദൂരിന് ഏതാനും ദിവസങ്ങൾക്ക് ശേഷം നടക്കുന്ന ഈ ഓപ്പറേഷൻ ഇന്ത്യൻ സുരക്ഷാ സേനയ്ക്ക് ഒരു വലിയ വിജയമായി കണക്കാക്കപ്പെടുന്നു.
ഏപ്രിലിൽ നടന്ന മാരകമായ പഹൽഗാം ആക്രമണത്തെത്തുടർന്ന് മേഖലയിൽ ഭീകരവിരുദ്ധ പ്രവർത്തനങ്ങൾ അധികൃതർ ശക്തമാക്കിയിട്ടുണ്ട്
