തിരുവനന്തപുരം: കേരളത്തിലേക്കുള്ള വിമാന സർവീസുകളിൽ അടുത്തിടെയുണ്ടായ കുറവ് എയർലൈനിന്റെ ശൈത്യകാല ഷെഡ്യൂളുമായി ബന്ധപ്പെട്ട ഒരു താൽക്കാലിക നടപടി മാത്രമാണെന്ന് എയർ ഇന്ത്യ എക്സ്പ്രസ് വ്യക്തമാക്കി. വെട്ടിക്കുറച്ച മിക്ക സർവീസുകളും ഉടൻ പുനഃസ്ഥാപിക്കുമെന്ന് ഉദ്യോഗസ്ഥർ ഉറപ്പ് നൽകി.
തിങ്കളാഴ്ച തിരുവനന്തപുരത്ത് മുഖ്യമന്ത്രി പിണറായി വിജയനുമായി നടത്തിയ ചർച്ചയിലാണ് എയർലൈൻ കമ്പനി അധികൃതർ ഇത് വ്യക്തമാക്കിയത്. ശൈത്യകാലത്ത് വടക്കൻ സംസ്ഥാനങ്ങളിൽ നിന്നുള്ള വർദ്ധിച്ചുവരുന്ന യാത്രാ ആവശ്യം നിറവേറ്റുന്നതിനാണ് ക്രമീകരണങ്ങൾ വരുത്തിയതെന്ന് എയർലൈൻ പ്രതിനിധികൾ വിശദീകരിച്ചു.
