പാലക്കാട് ജില്ലയിലെ ഒറ്റപ്പാലം നഗരത്തിൽ ഓടിക്കൊണ്ടിരുന്ന സ്വകാര്യ ബസിന് തീപിടിച്ച സംഭവം യാത്രക്കാരിൽ ആശങ്ക പരത്തി. പാലക്കാട് – ഗുരുവായൂർ റൂട്ടിൽ സർവീസ് നടത്തുന്ന ‘അമ്പാടി കണ്ണൻ’ എന്ന സ്വകാര്യ ബസിനാണ് തീപിടിച്ചത്.

ബസ് ഒറ്റപ്പാലം ഭാഗത്ത് എത്തിയപ്പോൾ വൈകുന്നേരം ഏകദേശം 6.45ഓടെ ബസിന്റെ അടിഭാഗത്ത് നിന്ന് പെട്ടെന്ന് പുകയും തീയും ഉയരുന്നത് ഡ്രൈവറുടെ ശ്രദ്ധയിൽപ്പെടുകയായിരുന്നു. ഉടൻ തന്നെ വാഹനം റോഡരികിലേക്ക് നിർത്തി യാത്രക്കാരെ പുറത്തേക്ക് മാറ്റിയതിനാൽ വലിയ അപകടം ഒഴിവായി. നാട്ടുകാരുടെയും സമീപത്തെ പെട്രോൾ പമ്പ് ജീവനക്കാരുടെയും സമയോചിത ഇടപെടലാണ് ദുരന്തം ഒഴിവാക്കാൻ സഹായിച്ചതെന്ന് റിപ്പോർട്ടുകൾ വ്യക്തമാക്കുന്നു.

പമ്പിൽ ഉണ്ടായിരുന്ന അഗ്നിശമന ഉപകരണങ്ങൾ ഉപയോഗിച്ച് തീ പടരുന്നത് പ്രാഥമികമായി നിയന്ത്രിച്ചു. തുടർന്ന് ഫയർ സർവീസ് സംഘവും സ്ഥലത്തെത്തി തീ പൂർണമായി അണച്ചു.
ഡീസൽ പൈപ്പ് പൊട്ടിയതാകാം തീപിടിത്തത്തിന് കാരണമെന്നാണ് പ്രാഥമിക നിഗമനം. സംഭവത്തിൽ ആർക്കും പരിക്കേറ്റിട്ടില്ല എന്നതാണ് ആശ്വാസകരമായ വിവരം. കൂടുതൽ പരിശോധനകൾ അധികൃതർ നടത്തിവരികയാണ്.
സംഭവത്തെ തുടർന്ന് കുറച്ചുസമയം ഗതാഗത തടസ്സവും അനുഭവപ്പെട്ടു.