തിരുവനന്തപുരം: കെഎസ്ആർടിസിയിൽ വിവിധ തസ്തികകളിൽ ജോലി ചെയ്യുന്ന ജീവനക്കാർക്ക് ഉടൻ പ്രമോഷൻ നൽകുമെന്ന് ഗതാഗത മന്ത്രി കെ. ബി. ഗണേഷ് കുമാർ അറിയിച്ചു.ടെക്നിക്കൽ വിഭാഗം മുതൽ എല്ലാ പോസ്റ്റുകളിലുമുള്ള അർഹരായ ജീവനക്കാരെ കണ്ടെത്തി പ്രമോഷൻ നൽകുന്നതിനുള്ള നടപടികൾ ആരംഭിക്കുമെന്ന് മന്ത്രി വ്യക്തമാക്കി.
കണ്ടക്ടർ, ഡ്രൈവർ ഉൾപ്പെടെ എല്ലാ പദവികളിലും ജോലി ചെയ്യുന്നവർക്ക് പ്രമോഷൻ പ്രതീക്ഷിക്കാമെന്നും, ഇതിനായി സിഎംഡിക്ക് ആവശ്യമായ നിർദ്ദേശങ്ങൾ നൽകിയിട്ടുണ്ടെന്നും മന്ത്രി പറഞ്ഞു. ഒരു മുതൽ രണ്ട് ദിവസങ്ങൾക്കുള്ളിൽ തന്നെ ഇതുമായി ബന്ധപ്പെട്ട ഔദ്യോഗിക പ്രഖ്യാപനം ഉണ്ടാകുമെന്നും അദ്ദേഹം കൂട്ടിച്ചേർത്തു.
അതേസമയം, ശമ്പളവും ഡി.എയും വർധിപ്പിക്കാനുള്ള ആഗ്രഹം സർക്കാരിനുണ്ടെങ്കിലും നിലവിൽ കെഎസ്ആർടിസി ഓവർഡ്രാഫ്റ്റ് സംവിധാനത്തിലൂടെയാണ് മുന്നോട്ടുപോകുന്നതെന്ന് മന്ത്രി ചൂണ്ടിക്കാട്ടി. സാമ്പത്തിക സ്ഥിതി മെച്ചപ്പെട്ടതിന് ശേഷമേ ശമ്പള വർധനവ് സംബന്ധിച്ച തീരുമാനം എടുക്കാനാകൂവെന്നും അദ്ദേഹം വ്യക്തമാക്കി.
