ഹൈദരാബാദ്: സന്ധ്യ തീയറ്ററിൽ തിക്കിലും തിരക്കിലും പെട്ട് ഒരാൾ മരിക്കാൻ ഇടയായ സംഭവത്തിൽ, പ്രതിചേർക്കപ്പെട്ട പ്രശസ്ത ചലച്ചിത്ര നടൻ അല്ലു അർജുന് നാമ്പള്ളി ക്രിമിനൽ കോടതി വെള്ളിയാഴ്ച ജാമ്യം അനുവദിച്ചു.50,000 രൂപ വീതമുള്ള രണ്ട് ആൾ ജാമ്യം നൽകാനും നിലവിലുള്ള അന്വേഷണവുമായി സഹകരിക്കാനും എല്ലാ ഞായറാഴ്ചയും ചിക്കാടപ്പള്ളി പോലീസ് സ്റ്റേഷനിൽ ഹാജരാകാനും നടനോട് നിർദ്ദേശിച്ചു.

ഹൈക്കോടതിയുടെ ഉത്തരവിനെ തുടർന്ന് നടൻ നാലാഴ്ചയായി ഇടക്കാല ജാമ്യത്തിലായിരുന്നു.  സംഭവത്തിൻ്റെ ഉത്തരവാദിത്തം അല്ലു അർജുനാണെന്ന് വാദിച്ച് പോലീസ് ജാമ്യാപേക്ഷയെ എതിർത്തപ്പോൾ, ദുരന്തത്തിൽ അദ്ദേഹത്തെ കുറ്റപ്പെടുത്താൻ കഴിയില്ലെന്ന് അദ്ദേഹത്തിൻ്റെ അഭിഭാഷക സംഘം വാദിച്ചു.

ഡിസംബർ 4 ന് അല്ലു അർജുൻ്റെ  ചിത്രമായ പുഷ്പ 2: ദി റൂൾ എന്ന ചിത്രത്തിൻ്റെ പ്രീമിയറിനിടെ സന്ധ്യ തിയേറ്ററിൽ തിക്കിലും തിരക്കിലും പെട്ട് ഒരു സ്ത്രീയുടെ ജീവൻ നഷ്ടപ്പെടുകയും മകന് ഗുരുതരമായി പരിക്കേൽക്കുകയും ചെയ്തു.  തുടർന്ന് തിയേറ്റർ മാനേജ്മെന്റിനും അല്ലു അർജുനും എതിരെ പോലീസ് കേസെടുത്തു.

ഡിസംബർ 13 ന് അല്ലു അർജുൻ അറസ്റ്റിലായി, അടുത്ത ദിവസം ഹൈക്കോടതി അനുവദിച്ച ഇടക്കാല ജാമ്യത്തിൽ പുറത്തിറങ്ങി.  അന്വേഷണങ്ങൾ തുടരുന്നതിനാൽ പ്രത്യേക വ്യവസ്ഥകളിൽ നടൻ്റെ മോചനം ഉറപ്പാക്കുന്നതാണ് നാമ്പള്ളി കോടതിയുടെ തീരുമാനം.