പ്രദേശത്തെ ഭീതിയിലാഴ്ത്തിയ ശേഷിക്കുന്ന രണ്ട് ‘കൊലയാളി’ ചെന്നായ്ക്കളെ പിടികൂടാൻ ബഹ്‌റൈച്ച് ജില്ലയിൽ വൻ തിരച്ചിൽ നടക്കുന്നു.  ഇതുവരെ നാല് ചെന്നായകളെ പിടികൂടിയെങ്കിലും വേട്ട തുടരുകയാണ്.

  കഴിഞ്ഞ ദിവസം രാത്രി ചെന്നായ്ക്കളെ കണ്ടതായി വിവരം ലഭിച്ചതിനെ തുടർന്ന് തെർമൽ ഡ്രോണുകളുമായി വനംവകുപ്പ് ഉദ്യോഗസ്ഥർ ഹർബക്ഷ് പൂർവ ഗ്രാമത്തിൽ നിന്ന് ഏതാനും കിലോമീറ്റർ അകലെ തിരച്ചിൽ നടത്തി.

 ഏകദേശം 30-35 കിലോമീറ്റർ വ്യാപിച്ചുകിടക്കുന്ന പ്രദേശത്ത്  വനപാലകരെ തിരച്ചിൽ നടത്താൻ വിന്യസിച്ചിട്ടുണ്ട്. വനംവകുപ്പ്, പോലീസ് വകുപ്പ്, ജില്ലാ ഭരണകൂടം എന്നിവ ഏകോപിപ്പിച്ച് രാത്രികാല ആക്രമണങ്ങൾ തടയാനും ദുരിതബാധിത പ്രദേശങ്ങളിൽ രാത്രി പട്രോളിംഗ് ഉറപ്പാക്കാനും പ്രവർത്തിക്കുന്നു.

ജൂലൈ 17 ന്, സിക്കന്ദർപൂർ ഗ്രാമത്തിൽ ഒരു വയസ്സുള്ള ആൺകുട്ടി കൊല്ലപ്പെട്ടതിന് ശേഷം, ഈ ആക്രമണങ്ങളിൽ കുറഞ്ഞത് 10 പേർക്ക് ജീവൻ നഷ്ടപ്പെടുകയും 30 ഓളം പേർക്ക് പരിക്കേൽക്കുകയും ചെയ്തു.  ചെന്നായ്ക്കളുടെ നിരന്തരമായ ഭീഷണി കാരണം ഡസൻ കണക്കിന് ഗ്രാമങ്ങളിലെ ആയിരക്കണക്കിന് നിവാസികൾ ഭയത്തോടെയാണ് ഉറങ്ങാതെ രാത്രികൾ കഴിച്ചുകൂട്ടുന്നത്.