ടെഹ്റാൻ: സർക്കാർ വിരുദ്ധ പ്രക്ഷോഭങ്ങൾ 13-ാം ദിവസത്തിലേക്ക് കടന്നതോടെ ഇറാനിൽ രാജ്യവ്യാപകമായി ശക്തമായ ഇന്റർനെറ്റ് നിയന്ത്രണം ഏർപ്പെടുത്തി. എല്ലാ 31 പ്രവിശ്യകളിലേക്കും പ്രതിഷേധം വ്യാപിച്ചതിന് പിന്നാലെയാണ് ഈ നടപടി. ജനുവരി എട്ടാം തീയതി വൈകുന്നേരത്തോടെ രാജ്യത്തെ ഇന്റർനെറ്റ് കണക്‌ടിവിറ്റി കുത്തനെ കുറഞ്ഞതായി നെറ്റ്‌ബ്ലോക്ക്സ് എന്ന നിരീക്ഷണ സംഘം അറിയിച്ചു. ജനുവരി ഒൻപതാം തീയതി രാവിലെയോടെ മൊബൈൽ ഫോൺ സേവനങ്ങളും ഗുരുതരമായി തടസ്സപ്പെട്ടതായി റിപ്പോർട്ടുകളുണ്ട്.

ഡിസംബർ ഇരുപത്തിയെട്ടിന് ആരംഭിച്ച പ്രതിഷേധങ്ങളിൽ ഇതുവരെ കുട്ടികളടക്കം കുറഞ്ഞത് 45 പേർ കൊല്ലപ്പെട്ടതായും 2,200-ലധികം പേരെ അറസ്റ്റ് ചെയ്തതായും മനുഷ്യാവകാശ സംഘടനകൾ വ്യക്തമാക്കി. പ്രവാസത്തിലിരിക്കുന്ന മുൻ കിരീടാവകാശി റെസ പഹ്ലവി ഏകോപിത പ്രതിഷേധങ്ങൾക്കും മേൽക്കൂരകളിൽ നിന്ന് മുദ്രാവാക്യങ്ങൾ വിളിക്കാനും ആഹ്വാനം ചെയ്തതിനെ തുടർന്നാണ് ടെഹ്റാനിലും മറ്റ് പ്രധാന നഗരങ്ങളിലും വൻ ജനക്കൂട്ടം തെരുവിലിറങ്ങിയത്.

ദൃക്സാക്ഷികൾ പറയുന്നതനുസരിച്ച് പ്രതിഷേധക്കാർ റോഡുകൾ ഉപരോധിക്കുകയും തീ കൊളുത്തുകയും സർക്കാരിനെതിരെ മുദ്രാവാക്യങ്ങൾ മുഴക്കുകയും ചെയ്തു. ഇതിന് മറുപടിയായി സുരക്ഷാസേന വെടിവയ്പ്പും കണ്ണീർവാതകവും പ്രയോഗിച്ചതായി റിപ്പോർട്ടുകളുണ്ട്. പരിക്കേറ്റ പ്രതിഷേധക്കാരെ അറസ്റ്റ് ചെയ്യുന്നതിനായി ആശുപത്രികളിൽ സുരക്ഷാസേന റെയ്ഡ് നടത്തിയെന്ന ആരോപണങ്ങളും ഉയർന്നിട്ടുണ്ട്. ഇതിനെ തുടർന്ന് അന്താരാഷ്ട്ര തലത്തിൽ ശക്തമായ പ്രതിഷേധം ഉയർന്നിട്ടുണ്ട്.

അതേസമയം, രാജ്യത്ത് വ്യോമപരിധി നിയന്ത്രണങ്ങളും ഏർപ്പെടുത്തിയിട്ടുണ്ട്. തബ്രിസ് ഉൾപ്പെടെ നിരവധി വിമാനത്താവളങ്ങളിൽ നിന്ന് വിമാന സർവീസുകൾ താൽക്കാലികമായി നിർത്തിവച്ചതായി റിപ്പോർട്ടുകൾ വ്യക്തമാക്കുന്നു.