ആപ്പിൾ വാച്ചിൻ്റെ ഹെൽത്ത് ഫീച്ചേർസ് ആരോഗ്യപരമായ അപകടസാധ്യതകൾ തിരിച്ചറിയാൻ അതിൻ്റെ ഉപയോക്താക്കളെ സഹായിക്കുന്നു. ഇപ്പോൾ പുതിയ റിപ്പോർട്ട് അനുസരിച്ച് ഒരു നോൺ-ഇൻവേസിവ് ബ്ലഡ് ഗ്ലൂക്കോസ് മോണിറ്ററിംഗ് നടത്തുന്നതിൽ കമ്പനി ഒരു സുപ്രധാന നാഴികക്കല്ലിൽ എത്തിയിരിക്കുന്നു . നിലവിൽ രക്തത്തിലെ ഗ്ലൂക്കോസ് നിരീക്ഷണ ഉപകരണങ്ങൾക്ക് വിശകലനത്തിനായി ഒരു രക്ത സാമ്പിൾ ലഭിക്കുന്നതിന് ഒരു വിരലിൽ കുത്തുന്നത് ആവശ്യമാണ്. ആപ്പിളിന്റെ പുതിയ സാങ്കേതികവിദ്യ ലക്ഷ്യമിടുന്നത് ഒരാളുടെ ചർമ്മത്തിൽ കുത്താതെ ഗ്ലൂക്കോസ് അളക്കാനാണ്.
ബ്ലൂംബെർഗ് റിപോർട്ട് അനുസരിച്ച് സിലിക്കൺ ഫോട്ടോണിക്സ് എന്നറിയപ്പെടുന്ന ഒരു ചിപ്പ് സാങ്കേതികവിദ്യയും ഗ്ലൂക്കോസിന്റെ അളവ് നിർണ്ണയിക്കാൻ ഒപ്റ്റിക്കൽ അബ്സോർപ്ഷൻ സ്പെക്ട്രോസ്കോപ്പി എന്ന പ്രക്രിയയും ആപ്പിൾ ഉപയോഗിക്കുന്നു.
ഈ സംവിധാനം ലേസർ ഉപയോഗിച്ച് ഗ്ലൂക്കോസിന്റെ സാന്ദ്രത വിശകലനം ചെയ്യുന്നു. അവ ചർമ്മത്തിന് താഴെയുള്ള ഒരു പ്രദേശത്തേക്ക് പ്രത്യേക തരംഗദൈർഘ്യമുള്ള പ്രകാശം പുറപ്പെടുവിക്കുന്നു.സെൻസറിലേക്ക് പ്രതിഫലിക്കുന്ന പ്രകാശം നൽകുന്ന വിവരങ്ങൾ ഒരു അൽഗോരിതം ഉപയോഗിച്ച് വ്യക്തിയുടെ രക്തത്തിലെ ഗ്ലൂക്കോസിന്റെ അളവ് നിർണ്ണയിക്കുന്നു.
ബ്ലൂംബെർഗ് പറയുന്നതനുസരിച്ച്, സാങ്കേതികവിദ്യ ഒരു പ്രാരംഭ ഘട്ടത്തിലാണെങ്കിലും പ്രായോഗികമാണ്. ഉപകരണത്തിൻ്റെ വൻതോതിലുള്ള ഉൽപാദനത്തിന് ഇനിയും വർഷങ്ങൾ എടുത്തേക്കാം.
