ബ്രസീലിയൻ ഫുട്ബോൾ താരം നെയ്മർ, ചൊവ്വാഴ്ച ഉറുഗ്വയ്‌ക്കെതിരായ ലോകകപ്പ് യോഗ്യതാ മത്സരത്തിനിടെ ഇടത് കാൽമുട്ടിന് പരിക്കേറ്റതിനെ തുടർന്ന് ശസ്ത്രക്രിയയ്ക്ക് വിധേയനാകും. ബ്രസീലിയൻ ഫുട്ബോൾ കോൺഫെഡറേഷൻ (CBF) ഇക്കാര്യം സ്ഥിരീകരിച്ചു.
മത്സരത്തിന്റെ 44-ാം മിനിറ്റിൽ ഉറുഗ്വയൻ മിഡ്ഫീൽഡർ നിക്കോളാസ് ഡി ലാ ക്രൂസുമായി കൂട്ടിയിടിച്ചതിനെ തുടർന്ന് നെയ്മറിനെ കളത്തിൽ നിന്ന് പുറത്തേക്ക് കൊണ്ടുപോയി. ബുധനാഴ്ച നടത്തിയ എംആർഐ സ്കാനിൽ പരിക്കിന്റെ വ്യാപ്തി സ്ഥിരീകരിച്ചു.
ഇനിയും നിശ്ചയിച്ചിട്ടില്ലാത്ത ഒരു തീയതിയിൽ നെയ്മർ ശസ്ത്രക്രിയയ്ക്ക് വിധേയനാകുമെന്നും, ബ്രസീലിയൻ ദേശീയ ടീമിന്റെയും നെയ്മറിന്റെ ക്ലബ്ബായ അൽ ഹിലാലിന്റെയും മെഡിക്കൽ വിഭാഗങ്ങൾ സ്‌ട്രൈക്കറെ സഹായിക്കുന്നതിൽ “നിരന്തര സമ്പർക്കത്തിലാണെന്നും” സിബിഎഫ് പ്രസ്താവനയിൽ പറഞ്ഞു .
31 കാരനായ നെയ്മർ ലോകത്തിലെ തന്നെ മികച്ച കളിക്കാരിൽ ഒരാളാണ് ,കൂടാതെ ബ്രസീൽ ടീമിൻ്റെ നെടുംതൂണായും കണക്കാക്കപ്പെടുന്നു. ദേശീയ ടീമിനായി 129 മത്സരങ്ങളിൽ നിന്നായി 79 ഗോളുകൾ അദ്ദേഹം നേടിയിട്ടുണ്ട്.
നെയ്മറിന്റെ പരിക്ക് 2026 ലോകകപ്പ് നേടാനുള്ള ബ്രസീലിന്റെ പ്രതീക്ഷകൾക്ക് ഏറ്റ കനത്ത തിരിച്ചടിയാണ്. അദ്ദേഹം ഏതാനം മാസത്തേക്ക് കളത്തിൽ നിന്ന് വിട്ടുനിൽക്കേണ്ടി വരുമെന്നാണ് പ്രതീക്ഷിക്കുന്നത്,
എന്നിരുന്നാലും, പരിക്ക് ഏറ്റാലും പെട്ടെന്ന് സുഖം പ്രാപിക്കുന്ന ചരിത്രം നെയ്മറിനുണ്ട്. മുൻകാലങ്ങളിൽ സമാനമായ തിരിച്ചടികൾ നേരിട്ടിട്ടുണ്ടെങ്കിലും എല്ലായ്‌പ്പോഴും പഴയ ഫോമിലേക്ക് തിരിച്ചെത്താൻ അദ്ദേഹത്തിന് കഴിഞ്ഞിട്ടുണ്ട്.
ദക്ഷിണ അമേരിക്കൻ ലോകകപ്പ് യോഗ്യതാ റൗണ്ടിൽ മൂന്നാമതുള്ള ബ്രസീൽ അടുത്ത മാസം നടക്കുന്ന യോഗ്യതാ റൗണ്ടിൽ കൊളംബിയയെയും അർജന്റീനയെയും നേരിടും.
പി‌എസ്‌ജിയിൽ ആറ് വർഷം ചെലവഴിച്ചതിനു ശേഷം കഴിഞ്ഞ ഓഗസ്റ്റിലാണ് 90 മില്യൺ യൂറോയ്ക്ക് (98.6 മില്യൺ ഡോളർ) നെയ്മർ അൽ ഹിലാലിൽ ചേർന്നത്
