എൽസിഞ്ഞോ എന്നറിയപ്പെടുന്ന പരിചയസമ്പന്നനായ ബ്രസീലിയൻ ഡിഫൻഡർ എൽസൺ ജോസ് ഡയസ് ജൂനിയറുടെ സേവനം രണ്ട് വർഷത്തെ കരാറിൽ ചെന്നൈയിൻ എഫ്‌സി സ്വന്തമാക്കി. 2024-25 സീസണിൽ ക്ലബ്ബിൻ്റെ പ്രതിരോധ ഓപ്ഷനുകൾ ശക്തിപ്പെടുത്തുന്നതിനായി 33 കാരൻ മറീന മച്ചാൻസിൽ ചേരും.

 ഈ ആഴ്ച ആദ്യം മിഡ്ഫീൽഡർ ജിതേന്ദ്ര സിങ്ങിനെ സ്വന്തമാക്കിയതിന് ശേഷം, എൽസിഞ്ഞോ ചെന്നൈയിൻ്റെ രണ്ടാമത്തെ സൈനിംഗായി. തൻ്റെ കരിയറിൽ 15 ഗോളുകളും രണ്ട് അസിസ്റ്റുകളും ഉൾപ്പെടെ 214 മത്സരങ്ങൾ കളിച്ചിട്ടുള്ള അദ്ദേഹം തൻ്റെ അനുഭവ സമ്പത്ത് ടീമിലേക്ക് കൊണ്ടുവരുന്നു.

  ചെന്നൈയിൻ മുഖ്യ പരിശീലകൻ ഓവൻ കോയ്ൽ എൽസിഞ്ഞോയെ സൈൻ ചെയ്തതിൽ സന്തോഷം പ്രകടിപ്പിച്ചു.  “സെൻട്രൽ മിഡ്ഫീൽഡിലും സെൻ്റർ ബാക്കിലും കളിക്കാൻ കഴിയുന്ന ശക്തനും സാങ്കേതിക മികവുമുള്ള ഫുട്ബോൾ കളിക്കാരനാണ് എൽസിഞ്ഞോ”  കോയിൽ പറഞ്ഞു.

 എൽസിഞ്ഞോ കഴിഞ്ഞ സീസണിൽ ജംഷഡ്പൂർ എഫ്‌സിയിൽ  25 മത്സരങ്ങളിൽ കളിച്ചു.  

 2014-ൽ   പ്രൊഫഷണൽ കരിയർ ആരംഭിക്കുകയും മെക്‌സിക്കൻ ക്ലബ് എഫ്‌സി ജുവാരസിനൊപ്പം അദ്ദേഹം ഒരു പ്രധാന കാലയളവ് ചെലവഴിക്കുകയും ചെയ്തു. 2017-നും 2019-നും ഇടയിൽ 136 മത്സരങ്ങൾ കളിച്ചു.