പാലക്കാട് ജില്ലയിലെ 2,500 ഡിവൈഎഫ്ഐ യൂണിറ്റുകളിൽ കരോൾ പരിപാടികൾ സംഘടിപ്പിക്കുമെന്ന് സംഘടന അറിയിച്ചു. പാലക്കാട് പുതുശ്ശേരിയിൽ കാളാണ്ടിത്തറയിൽ കരോൾ നടത്താനെത്തിയ കുട്ടികളുടെ സംഘത്തിന് നേരെയുണ്ടായ ആക്രമണത്തിൽ പ്രതിഷേധിച്ചാണ് ഈ തീരുമാനമെന്ന് ഡിവൈഎഫ്ഐ വ്യക്തമാക്കി.

കരോൾ സംഘത്തെ ബിജെപി–ആർഎസ്എസ് പ്രവർത്തകൻ ആക്രമിച്ചതായും, സംഭവത്തെ ബിജെപി നേതാവ് സി കൃഷ്ണകുമാർ ന്യായീകരിച്ചതായും ഡിവൈഎഫ്ഐ ആരോപിച്ചു. ഇതിനെതിരായ ശക്തമായ പ്രതികരണമായാണ് ജില്ലയിലുടനീളം കരോൾ പരിപാടികൾ സംഘടിപ്പിക്കുന്നതെന്ന് സംഘടന അറിയിച്ചു.

എല്ലാ ആഘോഷങ്ങളും മതഭേദമന്യേ, സൗഹൃദത്തിന്റെയും സഹവർത്തിത്വത്തിന്റെയും ഭാഗമായി ആഘോഷിക്കുമെന്നും, ഇത്തരം വർഗീയ നീക്കങ്ങൾക്കെതിരെ ശക്തമായ പ്രതിഷേധം ഉയർത്തുമെന്നും ഡിവൈഎഫ്ഐ സംസ്ഥാന സെക്രട്ടറി വി.കെ. സനോജ് പറഞ്ഞു. സമാധാനപരമായ സഹജീവിതത്തെ തകർക്കാനുള്ള ശ്രമങ്ങൾ ജനാധിപത്യ സമൂഹത്തിൽ അംഗീകരിക്കാനാവില്ലെന്നും അദ്ദേഹം കൂട്ടിച്ചേർത്തു.

ഈ സംഭവത്തെ തുടർന്ന് യൂത്ത് കോൺഗ്രസും ജില്ലയിൽ പ്രതിഷേധ കരോളുകൾ സംഘടിപ്പിച്ചിരുന്നു