വിഴിഞ്ഞം: വിഴിഞ്ഞം കോസ്റ്റ് ഗാർഡ് സ്റ്റേഷന്റെ പുതിയ കമാൻഡറായി കമാൻഡന്റ് സുരേഷ് ആർ കുറുപ്പ് ചുമതലയേറ്റു. വിഴിഞ്ഞം തീരസംരക്ഷണ കേന്ദ്രത്തിൽ നടന്ന ചടങ്ങിൽ സർവീസിൽ നിന്ന് വിരമിക്കുന്ന കമാൻഡന്റ് ജി. ശ്രീകുമാറിൽ നിന്നാണ് അദ്ദേഹം ചുമതല ഏറ്റെടുത്തത്

1994-ൽ സേനയിൽ ചേർന്ന പന്തളം സ്വദേശിയായ സുരേഷ് ആർ കുറുപ്പ് ഇന്ത്യൻ കോസ്റ്റ് ഗാർഡിന്റെ 22-ാം ബാച്ച് ഓഫീസറാണ്. പന്തളം എൻഎസ്എസ് കോളേജിൽ നിന്ന് ബി.എസ്.സി ഫിസിക്സിൽ ബിരുദം നേടിയ അദ്ദേഹം ഹൈദരാബാദിലെ ഐസിഎഫ്എഐ യൂണിവേഴ്സിറ്റിയിൽ നിന്ന് എംബിഎ പൂർത്തിയാക്കി.

ചുമതലയേറ്റ ശേഷം, തീരദേശ സുരക്ഷയും അടിസ്ഥാന സൗകര്യ വികസനവും ഊന്നൽ മേഖലകളായിരിക്കുമെന്ന് കമാൻഡന്റ് സുരേഷ് ആർ കുറുപ്പ് പറഞ്ഞു. മേഖലയുടെ പ്രവർത്തന ഫലപ്രാപ്തി വർധിപ്പിക്കുകയും രാജ്യത്തിന്റെ തീരദേശ സുരക്ഷ ശക്തിപ്പെടുത്തുകയും ചെയ്യുന്ന പദ്ധതികൾ നടപ്പിലാക്കാൻ ശ്രമിക്കുമെന്നും അദ്ദേഹം വ്യക്തമാക്കി.