ന്യൂഡൽഹി: മുൻ പ്രധാനമന്ത്രി ഡോ. മൻമോഹൻ സിങ്ങിന്റെ നിര്യാണത്തിൽ ആദരസൂചകമായി കേന്ദ്രസർക്കാർ ഏഴുദിവസത്തെ ദുഃഖാചരണം പ്രഖ്യാപിച്ചു. ഈ കാലയളവിൽ രാജ്യത്തുടനീളം ദേശീയ പതാക പകുതി താഴ്ത്തി പറത്തും. ഈ സമയത്ത് ഔദ്യോഗിക വിനോദ പരിപാടികൾ ഉണ്ടാകില്ല.

ഡോ. മൻമോഹൻ സിങ്ങിന് ഔദ്യോഗികമായ സംസ്‌കാര ശുശ്രൂഷ നൽകും. രാജ്യാന്തര തലത്തിൽ ഇന്ത്യയുടെ മിഷനുകളിലും ഹൈകമ്മീഷനുകളിലും സംസ്‌കാര ദിനത്തിൽ ദേശീയ പതാക പകുതി താഴ്ത്തി പറത്തും.

കേന്ദ്ര മന്ത്രിസഭ ഇന്ന് ഒരു പ്രത്യേക യോഗം ചേർന്ന് മുൻ പ്രധാനമന്ത്രിക്ക് ആദരാഞ്ജലി അർപ്പിക്കും. ഡോ. മൻമോഹൻ സിങ്ങ് തന്റെ കാലഘട്ടത്തിലെ ശ്രദ്ധേയനായ നേതാവായിരുന്നു, രാജ്യത്തിന്റെ സാമ്പത്തിക പുരോഗതിയിലും നയതന്ത്ര മേഖലയിലും ആഴത്തിലുള്ള സ്വാധീനം ചെലുത്തിയ അദ്ദേഹത്തിൻറെ നിര്യാണം രാജ്യത്തിന് വലിയ നഷ്ടമാണെന്ന് കേന്ദ്ര സർക്കാർ അറിയിച്ചു.