മദ്യപിച്ച് വാഹനം ഓടിച്ചതിന് പിടിക്കപ്പെട്ടതിനെ തുടർന്ന് കെഎസ്ആർടിസിയിൽ നിന്ന് പുറത്താക്കിയ ഡ്രൈവർമാരിൽ, ഗുരുതരമല്ലാത്ത കുറ്റങ്ങളിലപ്പെട്ടവരും മറ്റ് നിയമലംഘനങ്ങൾ ഇല്ലാത്തവരും തിരിച്ചെടുക്കാൻ സർക്കാർ തീരുമാനിച്ചു. നിലവിൽ കെഎസ്ആർടിസി കടുത്ത ഡ്രൈവർ ക്ഷാമം നേരിടുന്ന സാഹചര്യത്തിലാണ് ഈ തീരുമാനം എടുത്തതെന്ന് ഗതാഗതമന്ത്രി കെ.ബി. ഗണേഷ് കുമാർ വ്യക്തമാക്കി.
ഡ്രൈവർമാരുടെ കുറവ് സർവീസുകളെ ബാധിക്കുന്നതിനാൽ, സേവനം നിലനിർത്തുന്നതിനായാണ് പുറത്താക്കൽ നടപടി നേരിട്ട ചിലരെ തിരിച്ചെടുക്കുന്നതെന്നും മന്ത്രി പറഞ്ഞു. തിരിച്ചെടുക്കുന്ന ഡ്രൈവർമാരിൽ നിന്ന് 5,000 രൂപ പിഴ ഈടാക്കും. ഇത് അവസാന അവസരമായിരിക്കുമെന്നും, ഇനിയും ഇത്തരം നിയമലംഘനങ്ങൾ ആവർത്തിച്ചാൽ വീണ്ടും പുറത്താക്കുമെന്നും അദ്ദേഹം മുന്നറിയിപ്പ് നൽകി.
