ന്യൂയോർക്ക്: ഐക്യരാഷ്ട്രസഭ (യു.എൻ) അതിന്റെ ചരിത്രത്തിൽ ഏറ്റവും വലിയ പുനസംഘടനാ നടപടികൾക്കൊരുങ്ങുകയാണ്. 3.7 ബില്യൺ ഡോളർ ഓപ്പറേറ്റിംഗ് ബജറ്റിൽ 20% കുറവും, ഏകദേശം 6,900 ജീവനക്കാരുടെ ഒഴിവാക്കലും ആസൂത്രണം ചെയ്തിട്ടുണ്ട്. യു.എൻ സെക്രട്ടേറിയറ്റിലെ ജീവനക്കാരുടെ അഞ്ചിൽ ഒരാളെയാണ് ഈ നടപടി ബാധിക്കുക.
യു.എൻ-ന്റെ സാമ്പത്തിക പ്രതിസന്ധിയാണ് ഈ വലിയ മാറ്റത്തിന് കാരണം. അംഗരാജ്യങ്ങൾ, പ്രത്യേകിച്ച് അമേരിക്ക, വലിയ തോതിൽ അംഗത്വ ഫീസ് അടയ്ക്കാത്തതും ഇതിന് കാരണമായി. അമേരിക്ക ഏകദേശം 1.5 ബില്യൺ ഡോളർ യു.എൻ-ക്ക് നൽകാനുണ്ട്, സാധാരണ ബജറ്റിന്റെ നാലിലൊന്നാണ് അമേരിക്ക നൽകുന്നത്.
“UN80” എന്ന പേരിൽ ആരംഭിച്ച ഈ റീഫോം പദ്ധതി പ്രവർത്തനങ്ങൾ ലളിതമാക്കാനും, വകുപ്പുകൾ ഒന്നിപ്പിക്കാനും, ചിലവ് കുറയ്ക്കാനും, പ്രവർത്തനം ആധുനികമാക്കാനും ലക്ഷ്യമിടുന്നു. വിവിധ വകുപ്പുകൾക്ക് ജൂൺ 13-നകം വിശദമായ കുറവ് നിർദ്ദേശങ്ങൾ സമർപ്പിക്കാൻ നിർദേശം നൽകിയിട്ടുണ്ട്. ഈ മാറ്റങ്ങൾ 2026 ജനുവരി 1 മുതൽ പ്രാബല്യത്തിൽ വരും.
പ്രധാനമായും വകുപ്പുകൾ ഒന്നിപ്പിക്കൽ, ഏജൻസികൾ സംയോജിപ്പിക്കൽ, ഉയർന്ന ചെലവുള്ള നഗരങ്ങളിൽ നിന്നുള്ള ജീവനക്കാരെ മാറ്റി നിയമിക്കൽ, പ്രവർത്തനക്ഷമത വർദ്ധിപ്പിക്കൽ തുടങ്ങിയവയാണ് പ്രധാന പരിഷ്കാരങ്ങൾ.
