തിരുവനന്തപുരം ∙ ബിജെപി നേതാവ് രാജീവ് ചന്ദ്രശേഖർ കോൺഗ്രസിനെയും രാഹുൽ ഗാന്ധിയെയും കടുത്ത വിമർശനത്തിന് വിധേയമാക്കി. 2014-ൽ അഴിമതിയിലും കുടുംബാധിപത്യത്തിലും മുങ്ങിക്കിടന്ന പാർട്ടിയെ അധികാരത്തിൽ നിന്ന് പുറത്താക്കിയത് ജനറേഷൻ-സിയാണെന്ന് അദ്ദേഹം പറഞ്ഞു.

ജനറേഷൻ-സി ഇതിനകം തന്നെ അവരുടെ നിലപാട് വ്യക്തമാക്കിയിട്ടുണ്ടെന്നും അവർ കോൺഗ്രസിനെയും അഴിമതിയെയും സ്വജനപക്ഷപാതത്തെയും നിരാകരിച്ചിട്ടുണ്ടെന്നും അദ്ദേഹം കൂട്ടിച്ചേർത്തു.

“ജനറേഷൻ-സിക്ക് വേണ്ടത് തൊഴിലവസരങ്ങൾ സൃഷ്ടിക്കുന്ന, വികസനം മുന്നോട്ട് കൊണ്ടുപോകുന്ന, സാമ്പത്തിക സാധ്യതകൾ തുറന്നിടുന്ന രാഷ്ട്രീയക്കാരെയാണ്. കൈക്കൂലിയോ ഇടനിലക്കാരോ ഇല്ലാതെ അവരുടെ സ്വപ്നങ്ങൾ സാക്ഷാത്കരിക്കാനുള്ള അന്തരീക്ഷം ഒരുക്കുന്നവരെയാണ് അവർ തേടുന്നത്,” — രാജീവ് ചന്ദ്രശേഖർ വ്യക്തമാക്കി.

രാഹുൽ ഗാന്ധി ‘റിപ് വാൻ വിങ്കിളിന്റെ ദീർഘനിദ്ര’യിൽ നിന്ന് ഉണരേണ്ട സമയമാണിതെന്നും 2014-ൽ കുടുംബവാഴ്ചയ്‌ക്ക് വിരാമമിട്ടത് ജനറേഷൻ-സിയായിരുന്നുവെന്നും വരാനിരിക്കുന്ന തിരഞ്ഞെടുപ്പുകളിലും അവരത് തുടരുമെന്നും അദ്ദേഹം പറഞ്ഞു. “കഴിഞ്ഞ 75 വർഷമായി അഴിമതിയിലൂടെയും സ്വജനപക്ഷപാതത്തിലൂടെയും തലമുറകളെ വഞ്ചിച്ച പാർട്ടിയാണ് കോൺഗ്രസ്,” — രാജീവ് ചന്ദ്രശേഖർ വിമർശിച്ചു.