തിരുവനന്തപുരം: കേരളത്തിൽ ഏപ്രിൽ 3 മുതൽ 6 വരെ ഒറ്റപ്പെട്ട സ്ഥലങ്ങളിൽ ശക്തമായ ഇടിമിന്നലോടു കൂടിയ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് മുന്നറിയിപ്പ് നൽകി. തെക്കു കിഴക്കൻ അറബിക്കടലിനു മുകളിൽ ചക്രവാതച്ചുഴി നിലനിൽക്കുന്ന സാഹചര്യത്തിലാണ് സംസ്ഥാനത്ത് ഈ കാലാവസ്ഥാ വ്യതിയാനം ഉണ്ടാകുന്നതെന്ന് വിദഗ്ധർ വിലയിരുത്തുന്നു.
ചക്രവാതച്ചുഴിയുടെ സ്വാധീനത്തിൽ തെക്കൻ കേരളത്തിന് മുകളിൽ വരെ ന്യൂനമർദ്ദ പാത്തി രൂപപ്പെട്ടിരിക്കുകയാണ്. കൂടാതെ, അറബിക്കടലിലും ബംഗാൾ ഉൾക്കടലിലും നിന്നുള്ള കാറ്റിന്റെ സംയോജന ഫലമായാണ് സംസ്ഥാനത്ത് ശക്തമായ ഇടിമിന്നലോടുകൂടിയ മഴയ്ക്ക് സാധ്യതയെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ പ്രവചനം.
