തിരുവനന്തപുരം: വരാനിരിക്കുന്ന ശബരിമല തീർഥാടന കാലത്തെ സർവീസുമായി ബന്ധപ്പെട്ട് കേരള സ്റ്റേറ്റ് റോഡ് ട്രാൻസ്‌പോർട്ട് കോർപ്പറേഷന് (കെഎസ്ആർടിസി) കേരള ഹൈക്കോടതിയുടെ കർശന താക്കീത്.  സുരക്ഷാ മാനദണ്ഡങ്ങൾ കർശനമായി പാലിക്കണമെന്നും തീർഥാടകർക്ക് ബുദ്ധിമുട്ട് ഒഴിവാക്കണമെന്നും കോടതി കോർപ്പറേഷനോട് നിർദേശിച്ചിട്ടുണ്ട്.

സാധുതയുള്ള ഫിറ്റ്നസ് സർട്ടിഫിക്കറ്റ് ഇല്ലാത്ത ഒരു ബസും തീർഥാടന സർവീസിനായി വിന്യസിക്കുന്നില്ലെന്ന് ഉറപ്പാക്കാൻ കെഎസ്ആർടിസിക്ക് കോടതി പ്രത്യേകം നിർദേശം നൽകിയിട്ടുണ്ട്.  കൂടാതെ, തീർഥാടകരെ ഒരു കാരണവശാലും ബസുകളിൽ നിർത്തിക്കൊണ്ട് പോകരുതെന്നും കോടതി പറഞ്ഞു.

വാർഷിക മണ്ഡല-മകരവിളക്ക് തീർഥാടനത്തിനായി ശബരിമല ക്ഷേത്രം നാളെ തുറക്കാനിരിക്കെയാണ് ഹൈക്കോടതിയുടെ നിർദേശം.  ഭക്തജനത്തിരക്ക് കണക്കിലെടുത്ത് കെഎസ്ആർടിസി  ആയിരത്തോളം ബസുകളാണ് ഷെഡ്യൂളിനായി നിയോഗിക്കുന്നത്.

ഈ മാർഗനിർദേശങ്ങൾ നടപ്പാക്കുന്നത് നിരീക്ഷിക്കാനും തീർഥാടന സീസണിലെ കെഎസ്ആർടിസിയുടെ ഒരുക്കം സംബന്ധിച്ച് റിപ്പോർട്ട് സമർപ്പിക്കാനും ഗതാഗത കമ്മീഷണറോട് കോടതി ഉത്തരവിട്ടിട്ടുണ്ട്.  കോടതി ഉത്തരവുകൾ ലംഘിച്ചാൽ കർശന നടപടി സ്വീകരിക്കുമെന്ന് ഹൈക്കോടതി ദേവസ്വം ബെഞ്ച് മുന്നറിയിപ്പ് നൽകി.