തിരുവനന്തപുരത്തുനിന്ന് ഏകദേശം 32 കിലോമീറ്റർ അകലെ, 12,000 ഹെക്ടർ വനപ്രദേശത്താണ് നെയ്യാർ വന്യജീവി സങ്കേതം സ്ഥിതി ചെയ്യുന്നത്.  നെയ്യാറ്റിൻകര താലൂക്ക് മുതൽ തമിഴ്‌നാട്ടിലെ മുണ്ടന്തുറ ടൈഗർ റിസർവ് വരെ സങ്കേതം നീണ്ടുകിടക്കുന്നു.  നെയ്യാർ നദിയിൽ നിന്നാണ് നെയ്യാർ അണക്കെട്ടിന് ഈ പേര് ലഭിച്ചത്.ഏഷ്യൻ ആന, കടുവ, പുള്ളിപ്പുലി, കുരങ്ങന്മാർ, മുതലകൾ, രാജവെമ്പാട തുടങ്ങിയ അപൂർമായ സസ്യജന്തുജാലങ്ങളെ കാണാൻ ഈ വന്യജീവി സങ്കേതം അവസരം നൽകുന്നു. സന്ദർശകർക്ക് മാൻ പാർക്ക്, സിംഹ സഫാരി പാർക്ക്, മുതല ഫാം എന്നിവയും സമീപത്ത് കാണാൻ കഴിയും.

1958-ൽ നിർമ്മിച്ച നെയ്യാർ അണക്കെട്ട്, മനുഷ്യന്റെ സർഗ്ഗശേഷിയുടെയും പ്രകൃതിയുമായുള്ള ഇണങ്ങിയുള്ള ജീവിതത്തിന്റെയും തെളിവാണ്. 56 മീറ്റർ ഉയരത്തിൽ ഉയർന്നു നിൽക്കുന്ന  അണക്കെട്ടും അതിന്റെ മടിയിൽ പടർന്നു കിടക്കുന്ന ശാന്തമായ തടാകവും കാണുമ്പോൾ ആരും വിസ്മയിച്ചുപോകും. 

 വൈവിധ്യമാർന്ന സസ്യജന്തുജാലങ്ങളുടെ വിസ്മയകരമായ ലോകം ഒരുക്കി നിൽക്കുന്ന നെയ്യാർ വന്യജീവി സംരക്ഷണ കേന്ദ്രത്തിലൂടെ ഒരു സാഹസിക യാത്ര പുറപ്പെടുന്നത് വന്യതയുടെ സൗന്ദര്യം ആവോളം നുകരാൻ നിങ്ങൾക്ക് അവസരം നല്കും. സ്വതന്ത്രമായി സഞ്ചരിക്കുന്ന  ഏഷ്യൻ ആനകളെയും, ഒളിഞ്ഞുനടക്കുന്ന കടുവകളെയും,  മാനുകളെയും അവയുടെ സ്വന്തം ആവാസ വ്യവസ്ഥയിൽ കാണാൻ സാധിക്കും. ലജ്ജാശീലനായ കുരങ്ങനെയും, രാജവെമ്പലകൾ പോലുള്ള ഇഴജന്തുക്കളുടെ ലോകത്തെയും നിങ്ങൾക്ക് നേരിൽ കാണാൻ കഴിയും.

പച്ചപിടിച്ച മലകളുടെയും പച്ചപ്പ് നിറഞ്ഞ പുൽമേടുകളുടെയും മനോഹരമായ ദൃശ്യങ്ങൾ ആസ്വദിച്ചുകൊണ്ട് ശാന്തമായ നെയ്യാർ തടാകത്തിലൂടെ ബോട്ട് യാത്ര നടത്താം. മാനുകൾ സ്വതന്ത്രമായി വിഹരിക്കുന്ന ആകർഷകമായ മാൻപാർക്ക് സന്ദർശിക്കാം. സാഹസികത ആഗ്രഹിക്കുന്നവർക്ക്, സിംഹങ്ങളുടെ മഹത്വവും ശക്തിയും സുരക്ഷിതമായ വാഹനത്തിൽ നിന്ന് അനുഭവിക്കാൻ സിംഹ സഫാരിയിൽ പങ്കെടുക്കാം.

തുടർന്ന് മുതലകളുടെ ആകർഷകമായ ലോകത്തേക്ക് മുതല ഗവേഷണ കേന്ദ്രത്തിലൂടെ കടന്നുചെല്ലാം. അവയുടെ സംരക്ഷണ പ്രവർത്തനങ്ങളും പരിസ്ഥിതിയിലെ അവയുടെ നിർണായക പങ്കും മനസ്സിലാക്കാം. 

നിരവധി ഔഷധ സസ്യങ്ങൾ,  തോട്ടങ്ങൾ, പുൽമേടുകൾ എന്നിവയുടെ ആകർഷകമായ കാഴ്ച ഈ വന്യജീവി സങ്കേതം സമ്മാനിക്കുന്നു.   വൈവിധ്യമാർന്ന സസ്യജന്തുജാലങ്ങൾക്ക് പുറമെ നിരവധി ട്രക്കിംഗ് പാതകളും ഈ വന്യജീവി സങ്കേതത്തിലുണ്ട്.  അത്തരത്തിലുള്ള ഒരു വഴി നിങ്ങളെ 1868 മീറ്റർ ഉയരമുള്ള അഗസ്ത്യമല കൊടുമുടിയിലേക്ക് കൊണ്ടുപോകുന്നു.  

നിങ്ങൾ ഒരു പ്രകൃതി സ്‌നേഹിയായാലും, മൃഗസ്‌നേഹിയായാലും, അല്ലെങ്കിൽ നഗരജീവിതത്തിന്റെ തിരക്കുകളിൽ നിന്നും രക്ഷപ്പെടാൻ ആഗ്രഹിക്കുന്നവരായാലും, നെയ്യാർ വന്യജീവി സങ്കേതത്തിനു എല്ലാവർക്കും എന്തെങ്കിലും വാഗ്ദാനം ചെയ്യാനുണ്ട്.  വൈവിധ്യമാർന്ന വന്യജീവികൾ, അതിമനോഹരമായ പ്രകൃതിദൃശ്യങ്ങൾ, വിദ്യാഭ്യാസ അവസരങ്ങൾ എന്നിവയാൽ, ഈ വന്യജീവി സങ്കേതം അവിസ്മരണീയമായ ഒരു അനുഭവം വാഗ്ദാനം ചെയ്യുന്നു.