ഡെറാഡൂൺ: മലിനീകരണം തടയാനും പാരിസ്ഥിതിക സംരംഭങ്ങൾക്ക് വരുമാനം കണ്ടെത്താനും ലക്ഷ്യമിട്ട് ഉത്തരാഖണ്ഡ് സർക്കാർ ഇതരസംസ്ഥാന വാഹനങ്ങൾക്ക് ഗ്രീൻ സെസ് ഏർപ്പെടുത്താനൊരുങ്ങുന്നു. വാഹനത്തിൻ്റെ തരം അനുസരിച്ച് 20 രൂപ മുതൽ 80 രൂപ വരെയുള്ള സെസ് 2024 ഡിസംബർ അവസാനത്തോടെ പ്രാബല്യത്തിൽ വരുമെന്ന് അധികൃതർ അറിയിച്ചു.
ഉത്തരാഖണ്ഡിലേക്ക് പ്രവേശിക്കുന്ന വാണിജ്യ വാഹനങ്ങൾക്കും സ്വകാര്യ വാഹനങ്ങൾക്കും നടപടി ബാധകമാണ്. എന്നിരുന്നാലും, ഇരുചക്ര വാഹനങ്ങൾ, ഇലക്ട്രിക് വാഹനങ്ങൾ, സിഎൻജി വാഹനങ്ങൾ, സംസ്ഥാനത്തിനകത്ത് രജിസ്റ്റർ ചെയ്ത വാഹനങ്ങൾ എന്നിവയ്ക്ക് ഇളവുകൾ നൽകിയിട്ടുണ്ട്.
സെസ് ഘടനയിൽ മുച്ചക്ര വാഹനങ്ങൾക്ക് 20 രൂപയും നാല് ചക്ര വാഹനങ്ങൾക്ക് 40 രൂപയും ഇടത്തരം വാഹനങ്ങൾക്ക് 60 രൂപയും ഹെവി വാഹനങ്ങൾക്ക് 80 രൂപയും ഉൾപ്പെടുന്നതായി ഗതാഗത ജോയിൻ്റ് കമ്മീഷണർ സനത് കുമാർ സിംഗ് പറഞ്ഞു.
തടസ്സങ്ങളില്ലാത്ത ശേഖരണം ഉറപ്പാക്കാൻ, സംസ്ഥാന പ്രവേശന കേന്ദ്രങ്ങളിൽ സ്ഥാപിച്ചിട്ടുള്ള ഓട്ടോമാറ്റിക് നമ്പർ പ്ലേറ്റ് തിരിച്ചറിയൽ ക്യാമറകൾ സർക്കാർ ഉപയോഗിക്കും. ഇൻകമിംഗ് വാഹനങ്ങളുടെ ഫാസ്ടാഗ് വാലറ്റുകളിൽ നിന്ന് സെസ് സ്വയമേവ കുറയ്ക്കും.
