ഇന്ത്യ ടെസ്‌ല ഫാക്ടറി നിർമ്മിക്കാനുള്ള അനുയോജ്യമായ സ്ഥലമാണെന്ന് താൻ കരുതുന്നതായി വാൾ സ്ട്രീറ്റ് ജേണലിനു നൽകിയ അഭിമുഖത്തിൽ ടെസ്‌ല സിഇഒ എലോൺ മസ്ക് പറഞ്ഞു.
ടെസ്‌ല എക്സിക്യൂട്ടീവുകൾ ഇന്ത്യൻ ഗവൺമെന്റ് ഉദ്യോഗസ്ഥരെ സന്ദർശിച്ച് ദിവസങ്ങൾക്ക് ശേഷമാണ് അദ്ദേഹം ഇങ്ങനെ പറഞ്ഞത്
ഒരു പുതിയ ഫാക്ടറി നിർമ്മിക്കാൻ ഏറ്റവും താല്പര്യപെടുന്ന രാജ്യം ഏതാണെന്ന് മസ്‌കിനോട് ചോദിച്ചപ്പോൾ, അദ്ദേഹം ഇങ്ങനെ പ്രതികരിച്ചു. “യുഎസിന് പുറത്തുള്ള ഞങ്ങളുടെ അടുത്ത ലക്ഷ്യസ്ഥാനം മെക്‌സിക്കോയായിരിക്കുമെന്ന് ഞങ്ങൾ പറഞ്ഞിരുന്നു… ഞങ്ങൾ ഒരുപക്ഷേ ഈ വർഷാവസാനം മറ്റൊരു സ്ഥലം തിരഞ്ഞെടുക്കും .”
ഇന്ത്യയോട് താല്പര്യമാണോ എന്ന് അഭിമുഖം നടത്തിയയാൾ ചോദിച്ചപ്പോൾ, മസ്ക് മറുപടി പറഞ്ഞു, “തീർച്ചയായും.”
കഴിഞ്ഞയാഴ്ച, ടെസ്‌ലയിലെ മുതിർന്ന എക്സിക്യൂട്ടീവുകൾ ഇന്ത്യയുടെ റോഡ് ഗതാഗത, ഹൈവേ മന്ത്രാലയം, പ്രധാനമന്ത്രിയുടെ ഓഫീസ്, ഘന വ്യവസായ മന്ത്രാലയം എന്നിവയുടെ പ്രതിനിധികളുമായി ചർച്ച നടത്തി. ഈ ചർച്ചകൾ സൂചിപ്പിക്കുന്നത് ഇന്ത്യയിലെ ഉൽപ്പാദന സാധ്യതകൾ വിലയിരുത്തുന്നതിൽ ടെസ്‌ലയുടെ താൽപ്പര്യമാണ്.
ഒന്നോ രണ്ടോ രാജ്യങ്ങൾ പരിഗണിച്ച് ഒരു പുതിയ നിർമ്മാണ പ്ലാന്റിന് അനുയോജ്യമായ സ്ഥലം ടെസ്‌ല നിലവിൽ അന്വേഷിക്കുകയാണെന്ന് ഉറവിടങ്ങൾ സൂചിപ്പിക്കുന്നു. ഇന്ത്യയെ ഒരു സാധ്യതയുള്ള സ്ഥലമായി പരിഗണിക്കുന്നുണ്ടെങ്കിലും അന്തിമ തീരുമാനം ഇതുവരെ എടുത്തിട്ടില്ല. ഒരു നിർമ്മാണ കേന്ദ്രമെന്ന നിലയിൽ ഇന്ത്യയോടുള്ള ടെസ്‌ലയുടെ താൽപ്പര്യം, വാഹന, ഘടക നിർമ്മാണത്തിനുള്ള ലക്ഷ്യസ്ഥാനമെന്ന നിലയിൽ രാജ്യത്തിന്റെ സ്ഥാനത്തെ ശക്തിപ്പെടുത്തുന്നു.
