ബെംഗളൂരു ∙ ഇന്ത്യൻ ഹോക്കിയുടെ സ്വർണ്ണകാലത്തിന്റെ സാക്ഷിയും ഒളിമ്പിക്സിൽ മെഡൽ നേടിയ ആദ്യ മലയാളിയുമായ മാനുവൽ ഫ്രെഡറിക് (78) അന്തരിച്ചു. ബെംഗളൂരുവിലെ ഒരു സ്വകാര്യ ആശുപത്രിയിൽ അർബുദത്തിന് ചികിത്സയിലിരിക്കെയായിരുന്നു വെള്ളിയാഴ്ച (2025 ഒക്ടോബർ 31) രാവിലെയുണ്ടായ അന്ത്യം.

കണ്ണൂർ ജില്ലയിലെ ബർണശേരി സ്വദേശിയായ ഫ്രെഡറിക്, 1972-ലെ മ്യൂണിക്ക് ഒളിമ്പിക്സിൽ വെങ്കല മെഡൽ നേടിയ ഇന്ത്യൻ ഹോക്കി ടീമിന്റെ ഗോൾകീപ്പറായിരുന്നു. മികച്ച പ്രതിരോധ നൈപുണ്യത്തിലൂടെ ഇന്ത്യൻ ഹോക്കിയുടെ അന്താരാഷ്ട്ര പ്രതിച്ഛായ ഉയർത്തിയ താരമായിരുന്നു അദ്ദേഹം.

1973, 1978 വർഷങ്ങളിലെ ലോകകപ്പുകളിലും ഫ്രെഡറിക് ഇന്ത്യയ്ക്കായി ഗോൾവലയം കാത്തു. കായികരംഗത്തെ സമഗ്ര സംഭാവനകൾക്ക് 2019-ൽ ധ്യാൻചന്ദ് അവാർഡ് നൽകി രാജ്യം അദ്ദേഹത്തെ ആദരിച്ചു.

ഒരു വർഷം മുമ്പ് ഭാര്യ അന്തരിച്ചിരുന്നു. രണ്ട് പെൺമക്കളാണ് അദ്ദേഹത്തിനുള്ളത്