മുംബൈ ഭീകരാക്രമണത്തിന്റെ 15-ാം വാർഷികത്തോടനുബന്ധിച്ച് ഇസ്രായേൽ ലഷ്കർ-ഇ-തൊയ്ബയെ (LeT) ഒരു ഭീകര സംഘടനയായി ഔദ്യോഗികമായി പ്രഖ്യാപിച്ചു.

 ലഷ്കർ-ഇ-തൊയ്ബയെ ഭീകര സംഘടനയായി പ്രഖ്യാപിക്കുന്നതിന് ആവശ്യമായ എല്ലാ നടപടിക്രമങ്ങളും പൂർത്തിയായതായി ഇസ്രായേൽ എംബസി പ്രസ്താവനയിൽ പറഞ്ഞു. ഇന്ത്യൻ സർക്കാരിന്റെ ഔപചാരികമായ അഭ്യർത്ഥന കൂടാതെയാണ് സ്വതന്ത്രമായി തീരുമാനമെടുത്തത്.

 ചബാദ് ഹൗസ് എന്നറിയപ്പെടുന്ന മുംബൈയിലെ ചബാദ് ലുബാവിച്ച് ജൂത കേന്ദ്രത്തിൽ നടന്ന ഭീകരാക്രമണത്തിൽ ഇരകളായ ആറ് ജൂതന്മാരിൽ രണ്ട് ഇസ്രായേലി പൗരന്മാർ – ഗബ്രിയേൽ ഹോൾട്ട്‌സ്‌ബെർഗ്, റിവ്ക ഹോൾട്ട്‌സ്‌ബെർഗ് എന്നിവരും ഉൾപ്പെടുന്നു.

 നൂറുകണക്കിന് ഇന്ത്യക്കാരുടെ കൊലപാതകത്തിന് ഉത്തരവാദികളായ എൽഇടിയെ “മാരകവും അപലപനീയവുമായ ഭീകരസംഘടന” എന്ന് വിശേഷിപ്പിച്ച എംബസി, “2008 നവംബർ 26-ലെ ഹീനമായ നടപടികൾ ഇപ്പോഴും എല്ലാ സമാധാനം ആഗ്രഹിക്കുന്ന രാഷ്ട്രങ്ങളിലൂടെയും സമൂഹങ്ങളിലൂടെയും ശക്തമായി പ്രതിധ്വനിക്കുന്നു” എന്ന് പറഞ്ഞു.

 ഭീകരതയുടെ ഇരകളോടും അതിജീവിച്ചവരോടും മുംബൈ ആക്രമണത്തിൽ മരിച്ചവരോടും ദുഃഖിതരായ കുടുംബങ്ങളോടും ഇസ്രായേൽ എംബസി ആത്മാർത്ഥമായ അനുശോചനം രേഖപ്പെടുത്തി . ഈ ഹീനമായ പ്രവൃത്തിയുടെ ദുരിതം അനുഭവിച്ച ഇസ്രായേലിലുള്ളവർക്ക് ഐക്യദാർഢ്യം പ്രഖ്യാപിച്ചു.

 “ഒരു സമാധാനപരമായ ഭാവിക്കായി ഞങ്ങൾ നിങ്ങളോടൊപ്പം ഐക്യത്തോടെ നിൽക്കുന്നു.” എംബസി പറഞ്ഞു