ഇന്ത്യൻ സ്പേസ് റിസർച്ച് ഓർഗനൈസേഷൻ (ഐഎസ്ആർഒ) ചന്ദ്രയാൻ -3 ന്റെ വിക്ഷേപണ തീയതി ജൂലൈ 14 ലേക്ക് പുനഃക്രമീകരിച്ചു. നേരത്തെ, ചന്ദ്രയാൻ -3 ജൂലൈ 13 ന് വിക്ഷേപിക്കാൻ തീരുമാനിച്ചിരുന്നു, എന്നാൽ ഇപ്പോൾ തീയതി ജൂലൈ 14 ലേക്ക് മാറ്റിയതായി ഐഎസ്ആർഒ ട്വിറ്ററിൽ അറിയിച്ചു. 

ചന്ദ്രയാൻ -2 ന്റെ തുടർന്നുള്ള ദൗത്യമായ ചന്ദ്രയാൻ -3, ആന്ധ്രാപ്രദേശിലെ ശ്രീഹരിക്കോട്ടയിലുള്ള സതീഷ് ധവാൻ ബഹിരാകാശ കേന്ദ്രത്തിൽ നിന്ന് ജൂലൈ 14 ന് ഉച്ചകഴിഞ്ഞ് 2:35 ന് ഇന്ത്യൻ സമയം വിക്ഷേപിക്കും.  ജിയോസിൻക്രണസ് സാറ്റലൈറ്റ്  ലോഞ്ച് വെഹിക്കിൾ മാർക്ക് III (എൽവിഎം3) ചന്ദ്രയാൻ -3 നെ ബഹിരാകാശത്തേക്ക് കൊണ്ടുപോകും.  ഐഎസ്ആർഒയുടെ ഏറ്റവും വലുതും ശക്തവുമായ റോക്കറ്റാണ് എൽവിഎം3.

ഓഗസ്റ്റ് 23-നോ 24-നോ ചന്ദ്രയാൻ-3 ചന്ദ്രനിൽ സോഫ്റ്റ് ലാൻഡിംഗ് നടത്താൻ ശ്രമിക്കുമെന്ന് ഐഎസ്ആർഒ ചെയർമാൻ എസ് സോമനാഥ് അറിയിച്ചു.

ചന്ദ്രയാൻ -3 ന്റെ പ്രാഥമിക ലക്ഷ്യം ചന്ദ്രന്റെ ദക്ഷിണ ധ്രുവത്തിനടുത്തുള്ള ഉയർന്ന പ്രദേശത്ത് ഒരു ലാൻഡറും റോവറും സ്ഥാപിക്കുക എന്നതാണ്

ചന്ദ്രനിൽ ശാസ്ത്രീയ പരീക്ഷണങ്ങൾ നടത്തുക, ഗ്രഹാന്തര ദൗത്യങ്ങൾക്ക് ആവശ്യമായ പുതിയ സാങ്കേതികവിദ്യകൾ വികസിപ്പിക്കുകയും പ്രദർശിപ്പിക്കുകയും ചെയ്യുക എന്നിവയാണ് ചന്ദ്രയാൻ-3 ന്റെ മറ്റ് ലക്ഷ്യങ്ങൾ.

ലാൻഡർ, റോവർ, പ്രൊപ്പൽഷൻ മൊഡ്യൂൾ എന്നിവ അടങ്ങിയ ചന്ദ്രയാൻ-3 ന്റെ ആകെ ഭാരം 3,900 കിലോഗ്രാം ആണ്.  2,148 കിലോഗ്രാം ഭാരമുള്ള പ്രൊപ്പൽഷൻ മൊഡ്യൂൾ ലാൻഡറിനെയും റോവറിനെയും 100 കിലോമീറ്റർ ചാന്ദ്ര ഭ്രമണപഥത്തിൽ എത്തിക്കും. 

ചന്ദ്രയാൻ-2ന്റെ വിക്രം റോവറിന് സമാനമായിരിക്കും റോവർ, എന്നാൽ സുരക്ഷിതമായ ലാൻഡിംഗ് ഉറപ്പാക്കാൻ സഹായിക്കുന്ന മെച്ചപ്പെടുത്തലുകൾ വരുത്തിയിട്ടുണ്ട്.

ചന്ദ്രയാൻ-3 ലാൻഡർ രൂപകൽപ്പന ചെയ്തിരിക്കുന്നത് ചന്ദ്രനിൽ സുരക്ഷിതമായി ഒരു  സ്ഥലത്ത് ലാൻഡ് ചെയ്യാനും റോവറിനെ വിന്യസിക്കാനുമാണ്, അതിന്റെ ലക്ഷ്യം ചന്ദ്രോപരിതലത്തിൽ രാസ പരിശോധന നടത്തുക എന്നതാണ്.  പ്രൊപ്പൽഷൻ മൊഡ്യൂൾ ലാൻഡർ മൊഡ്യൂളിനെ അവസാന 100 കിലോമീറ്റർ വൃത്താകൃതിയിലുള്ള ഭ്രമണപഥത്തിലേക്ക് കൊണ്ടുപോകും.  ഈ ഭ്രമണപഥത്തിലെത്തിയ ശേഷം ലാൻഡർ മൊഡ്യൂളും പ്രൊപ്പൽഷൻ മൊഡ്യൂളും വേർപെടും

വേർപിരിയലിനു ശേഷവും പ്രൊപ്പൽഷൻ മൊഡ്യൂൾ ചന്ദ്രനുചുറ്റും ഭ്രമണപഥത്തിൽ തുടരുകയും ആശയവിനിമയ റിലേ ഉപഗ്രഹമായി പ്രവർത്തിക്കുകയും ചെയ്യും, നാസ അതിന്റെ വെബ്‌സൈറ്റിൽ പറയുന്നു.

ബോക്‌സ് ആകൃതിയിലുള്ള ലാൻഡറിന് നാല് ലാൻഡിംഗ് കാലുകൾ, നാല് ലാൻഡിംഗ് ത്രസ്റ്ററുകൾ, സുരക്ഷിതമായ ടച്ച്‌ഡൗൺ ഉറപ്പാക്കാൻ നിരവധി സെൻസറുകൾ, അപകടങ്ങൾ ഒഴിവാക്കാനും പൊസിഷനൽ പരിജ്ഞാനം നേടാനുമുള്ള ക്യാമറകളുമുണ്ട്. ആശയവിനിമയം ഉറപ്പാക്കുന്ന എക്സ് ബാൻഡ് ആന്റിനയും ലാൻഡറിൽ സജ്ജീകരിച്ചിരിക്കുന്നു.

ദീർഘചതുരാകൃതിയിലുള്ള റോവറിന് ആറ് ചക്രങ്ങളും നാവിഗേഷൻ ക്യാമറയുമുണ്ട്.