റോഡ് സുരക്ഷയും അപകട പ്രതികരണ സംവിധാനങ്ങളും മെച്ചപ്പെടുത്തുന്നതിനുള്ള സുപ്രധാന ചുവടുവയ്പ്പായി, അപകടത്തിൽപ്പെട്ടവർക്ക് പണരഹിത ചികിത്സ പദ്ധതി രാജ്യത്ത് ഉടൻ ആരംഭിക്കുമെന്ന് കേന്ദ്ര റോഡ് ഗതാഗത, ഹൈവേ മന്ത്രി നിതിൻ ഗഡ്കരി ലോക്സഭയിൽ അറിയിച്ചു. 

നിലവിൽ ആറ് സംസ്ഥാനങ്ങളിൽ പ്രവർത്തിക്കുന്ന ഈ പദ്ധതി ആദ്യം ഉത്തർപ്രദേശിലേക്ക് വ്യാപിപ്പിക്കുമെന്ന് ചോദ്യോത്തര വേളയിൽ ഗഡ്കരി സഭയെ അറിയിച്ചു.റോഡ് അപകടത്തിൽപ്പെട്ടവർക്ക് നിയുക്ത ആശുപത്രികളിൽ നിന്ന് 1.5 ലക്ഷം രൂപ വരെ പണരഹിത ചികിത്സ ലഭിക്കാൻ ഈ സംരംഭം അനുവദിക്കുന്നു.

റോഡ് സുരക്ഷയെ അഭിസംബോധന ചെയ്യേണ്ടതിൻ്റെ അടിയന്തര പ്രാധാന്യം എടുത്തുകാണിച്ച മന്ത്രി ഹൈവേകളിൽ  വർദ്ധിച്ചുവരുന്ന അപകടങ്ങളുടെ എണ്ണത്തിൽ, ആശങ്ക രേഖപ്പെടുത്തി.  ഉത്തർപ്രദേശ്, തമിഴ്‌നാട്, മഹാരാഷ്ട്ര, മധ്യപ്രദേശ് തുടങ്ങിയ സംസ്ഥാനങ്ങളിലാണ് ഏറ്റവും കൂടുതൽ അപകടങ്ങൾ സംഭവിക്കുന്നതെന്നും ഡൽഹി, ബെംഗളൂരു, ജയ്പൂർ എന്നീ നഗരങ്ങൾ  അപകട സ്ഥിതിവിവരക്കണക്കുകളിൽ മുന്നിലാണെന്നും വെളിപ്പെടുത്തി.

റോഡപകടങ്ങളിൽപ്പെട്ടവരിൽ 30% പേരും നേരത്തെ ചികിത്സ ലഭിക്കാൻ വൈകുന്നത് മൂലമാണ് മരണത്തിന് കീഴടങ്ങുന്നതെന്ന് ഗഡ്കരി ചൂണ്ടിക്കാട്ടി.  “പണരഹിത ചികിത്സാ പദ്ധതി ഇതിനകം പ്രവർത്തിക്കുന്ന ആറ് സംസ്ഥാനങ്ങളിലായി 2,100 ജീവൻ രക്ഷിച്ചു,” അദ്ദേഹം പറഞ്ഞു.

പാർലമെൻ്റ് അംഗങ്ങൾ ജില്ലാതലത്തിൽ അപകട നിവാരണ സമിതികൾ രൂപീകരിക്കണമെന്നും മന്ത്രി ആവശ്യപ്പെട്ടു.  ഈ സമിതികൾ അപകടങ്ങളുടെ കാരണങ്ങൾ അന്വേഷിക്കുകയും അവ തടയുന്നതിനുള്ള നടപടികൾ നിർദ്ദേശിക്കുകയും ചെയ്യേണ്ടതാണ്

പദ്ധതി രാജ്യവ്യാപകമായി നടപ്പിലാക്കുന്നത് റോഡപകടത്തിൽപ്പെട്ടവർക്കുള്ള അടിയന്തര വൈദ്യസഹായത്തിലെ ഗുരുതരമായ വിടവുകൾ പരിഹരിക്കുന്നതിനൊപ്പം എണ്ണമറ്റ കുടുംബങ്ങൾക്ക് ആശ്വാസം പകരുമെന്ന് പ്രതീക്ഷിക്കുന്നു.