തിരുവനന്തപുരം: 2026 ലെ നിയമസഭാ തിരഞ്ഞെടുപ്പിൽ താൻ മത്സരിക്കില്ലെന്ന് കെ.വി. തോമസ് വ്യക്തമാക്കി. നിരവധി തവണ തെരഞ്ഞെടുപ്പുകളിൽ മത്സരിച്ചിട്ടുള്ള വ്യക്തിയെന്ന നിലയിൽ നിലവിൽ വീണ്ടും മത്സരിക്കാനുള്ള ആഗ്രഹം ഇല്ലെന്നും, ആരോപണങ്ങളുടെയും സമ്മർദ്ദങ്ങളുടെയും ഇടയിൽ നിന്ന് മാറി സ്വസ്ഥമായ ജീവിതം നയിക്കാനാണ് താൽപര്യമെന്നും അദ്ദേഹം പറഞ്ഞു.

എറണാകുളം മണ്ഡലത്തിൽ ഇടതുമുന്നണി സ്ഥാനാർത്ഥിയായി കെ.വി. തോമസ് മത്സരിക്കുമെന്ന സൂചനകൾ ഉണ്ടായിരുന്നെങ്കിലും, ഇത്തരമൊരു സാധ്യത അദ്ദേഹം നിഷേധിച്ചു. നിലവിൽ തിരഞ്ഞെടുപ്പ് രാഷ്ട്രീയത്തിലേക്ക് മടങ്ങിവരാനുള്ള പദ്ധതിയില്ലെന്നും അദ്ദേഹം കൂട്ടിച്ചേർത്തു.

കോൺഗ്രസിന്റെ ഇപ്പോഴത്തെ അവസ്ഥയിൽ താൻ നിരാശനാണെന്നും, പാർട്ടിയിൽ യഥാർത്ഥത്തിൽ ആരാണ് നേതൃത്വം വഹിക്കുന്നത് എന്ന കാര്യത്തിൽ ഇപ്പോഴും സംശയമുണ്ടെന്നും കെ.വി. തോമസ് അഭിപ്രായപ്പെട്ടു. കേന്ദ്രതലത്തിൽ ബിജെപിക്കെതിരെ കോൺഗ്രസും സിപിഎമ്മും ഒരുമിച്ച് നിൽക്കുന്ന സാഹചര്യത്തിൽ കേരളത്തിൽ നിലപാട് വ്യത്യസ്തമാണെന്നും അദ്ദേഹം ചൂണ്ടിക്കാട്ടി.

തന്റെ മകൾ തെരഞ്ഞെടുപ്പിൽ വരുന്നതിനോ മത്സരിക്കുന്നതിനോ നിലവിൽ താൽപര്യമില്ലെന്നും അദ്ദേഹം വ്യക്തമാക്കി. ഇപ്പോൾ കേരള സർക്കാരിന്റെ ഡൽഹിയിലെ പ്രത്യേക പ്രതിനിധിയായി ക്യാബിനറ്റ് പദവിയോടെ പ്രവർത്തിച്ചു വരുന്നതിനാൽ, ആ ചുമതലയിൽ തന്നെ തുടർന്നുകൊണ്ടുപോകാനാണ് ആഗ്രഹമെന്നും കെ.വി. തോമസ് പറഞ്ഞു.