കേരളത്തിൽ മദ്യശാലകളുടെ വർദ്ധനവും മദ്യ-മയക്കുമരുന്ന് ദുരുപയോഗത്തിനെതിരെ സർക്കാരിൻ്റെ അനാസ്ഥയും ചൂണ്ടിക്കാട്ടി കേരള കത്തോലിക്കാ ബിഷപ്പ് കോൺഫറൻസ് (കെസിബിസി) സംസ്ഥാന സർക്കാരിനെ വിമർശിച്ചു. ഞായറാഴ്ച സംസ്ഥാനത്തെ കത്തോലിക്കാ ദേവാലയങ്ങളിൽ വായിച്ച സർക്കുലറിലൂടെയാണ് ഈ വിമർശനം ഉയർന്നത്.

കേരളത്തിലെ കത്തോലിക്കാ സഭയുടെ 32 രൂപതകളിൽ മദ്യ മയക്കുമരുന്ന് വിരുദ്ധ പ്രവർത്തനങ്ങൾ നടന്നു വരികയാണെന്ന് കെസിബിസിയുടെ ടെമ്പറൻസ് കമ്മീഷൻ പുറത്തിറക്കിയ സർക്കുലറിൽ കമ്മീഷൻ ചെയർമാനായ ബിഷപ്പ് ആംബ്രോസ് പുത്തൻവീട്ടിൽ പറഞ്ഞു.

മദ്യത്തിനും മയക്കുമരുന്ന് എതിരെ സഭയും സാമൂഹിക സംഘടനകളും ശക്തമായി ശബ്ദമുയർത്തുന്നുണ്ടെങ്കിലും അത് നിയന്ത്രിക്കാൻ അധികാരികൾ പലപ്പോഴും ഫലപ്രദമായ നടപടികൾ സ്വീകരിക്കുന്നില്ലെന്ന് സർക്കുലറിൽ പറയുന്നു. പകരം സംസ്ഥാനത്ത് മദ്യശാലകളുടെ എണ്ണം വർധിപ്പിച്ചുകൊണ്ടിരിക്കുകയാണ് കെസിബിസി ആരോപിച്ചു.

മദ്യലഭ്യത കുറയ്ക്കുമെന്ന് മുമ്പ് നൽകിയ വാഗ്ദാനങ്ങൾ ഉണ്ടായിരുന്നുവെങ്കിലും ഇന്ന് സംസ്ഥാനത്ത് ആയിരക്കണക്കിന് ബാറുകളും ബിവറേജ് ഔട്ട്‌ലെറ്റുകളും ടോഡി ഷോപ്പുകളും പ്രവർത്തിക്കുന്നുവെന്ന് സർക്കുലർ ചൂണ്ടിക്കാട്ടി.

അതേസമയം, എംഡിഎംഎ പോലുള്ള അപകടകരമായ മയക്കുമരുന്നുകളും ഹൈബ്രിഡ് കഞ്ചാവും സംസ്ഥാനത്ത് വ്യാപകമായി പടരുകയാണെന്നും കമ്മീഷൻ മുന്നറിയിപ്പ് നൽകി. സർക്കാരിന്റെ വിലയിരുത്തലുകൾ പ്രകാരം ഏകദേശം 1,400 സ്കൂളുകൾ മയക്കുമരുന്ന് വ്യാപനത്തിന്റെ ഹോട്ട്‌സ്പോട്ടുകളായി മാറിയിട്ടുണ്ടെന്നും സർക്കുലറിൽ പറയുന്നു.

കുട്ടികളെയും യുവാക്കളെയും മയക്കുമരുന്ന് മാഫിയകൾ വലയിലാക്കുകയാണെന്നും മാതാപിതാക്കൾ ജാഗ്രത പാലിക്കാത്ത പക്ഷം അവരുടെ ഭാവി അപകടത്തിലാകുമെന്നും കെസിബിസി മുന്നറിയിപ്പ് നൽകി. മദ്യവും മയക്കുമരുന്നും കുടുംബങ്ങളിലുണ്ടാക്കുന്ന ദോഷഫലങ്ങൾ ഭീകരമാണെന്നും, കുടുംബബന്ധങ്ങൾ തകരുകയും ഗുരുതര കുറ്റകൃത്യങ്ങൾ വർധിക്കുകയും ചെയ്യുന്നുവെന്നും സർക്കുലർ ചൂണ്ടിക്കാട്ടുന്നു

മദ്യവും മയക്കുമരുന്നും സമൂഹത്തിൽ ആഴത്തിൽ കടന്നുകയറിയിരിക്കുകയാണെന്നും, ഇത് കുടുംബങ്ങളെ നിശബ്ദമായി തകർക്കുകയാണെന്നും കെസിബിസി അഭിപ്രായപ്പെട്ടു. “ഇത്തരത്തിലുള്ള ദുഷ്പ്രവണതകൾക്കെതിരെ സഭ പ്രവാചകന്മാരെ പോലെ ഉയിർത്തെഴുന്നേൽക്കണം; ഇത്തരം നാശത്തിനുമുന്നിൽ മൗനം പാലിക്കുന്നത് തന്നെ പാപമാണ്,” എന്നും സർക്കുലറിൽ പറയുന്നു.
ഇതിന്റെ ഭാഗമായി ഞായറാഴ്ച സംസ്ഥാനത്തെ വിവിധ ദേവാലയങ്ങളിൽ കെസിബിസി ടെംപറൻസ് കമ്മീഷന്റെ നേതൃത്വത്തിൽ മദ്യ-മയക്കുമരുന്ന് വിരുദ്ധ ദിനം ആചരിക്കുകയും വിവിധ ബോധവത്കരണ പരിപാടികൾ സംഘടിപ്പിക്കുകയും ചെയ്തു.