കേരള മുഖ്യമന്ത്രി പിണറായി വിജയൻ എട്ട് ദിവസത്തെ അമേരിക്ക , ക്യൂബ സന്ദർശനത്തിനായി യാത്ര പുറപ്പെട്ടു

ന്യൂയോർക്കിലെ ടൈംസ് സ്ക്വയറിലെ മാരിയറ്റ് മാർക്വിസിൽ ജൂൺ 10ന് ലോക കേരള സഭയുടെ മേഖലാ സമ്മേളനം പിണറായി വിജയൻ ഉദ്ഘാടനം ചെയ്യും. സ്പീക്കർ എ എൻ ഷംസീറിന്റെ അധ്യക്ഷതയിൽ ധനമന്ത്രി കെ എൻ ബാലഗോപാൽ, ലോക കേരള സഭയിലെ പ്രമുഖർ, ചീഫ് സെക്രട്ടറി വി പി ജോയ്, മറ്റ് ഉദ്യോഗസ്ഥർ എന്നിവർ പങ്കെടുക്കും.

ന്യൂയോർക്കിൽ ജൂൺ 9 വെള്ളിയാഴ്ച മുഖ്യമന്ത്രി 9/11 സ്മാരകത്തിൽ ആദരാഞ്ജലി അർപ്പിക്കുകയും ഐക്യരാഷ്ട്രസഭയുടെ ആസ്ഥാനവും സന്ദർശിക്കുകയും ചെയ്യും. ജൂൺ 11ന് അദ്ദേഹം അമേരിക്കയിലെ മലയാളി നിക്ഷേപകർ, പ്രമുഖ പ്രവാസി മലയാളികൾ, ഐടി വിദഗ്ധർ, വിദ്യാർഥികൾ, വനിതാ സംരംഭകർ എന്നിവരുമായി സംവദിക്കുന്ന ബിസിനസ് ഇൻവെസ്റ്റ്‌മെന്റ് മീറ്റ് ഉദ്ഘാടനം ചെയ്യും. അന്ന് വൈകിട്ട് ടൈംസ് സ്ക്വയറിൽ നടക്കുന്ന പൊതുസമ്മേളനത്തിൽ പിണറായി വിജയൻ പ്രവാസി സമൂഹത്തെ അഭിസംബോധന ചെയ്യും.

ജൂൺ 12ന് വാഷിംഗ്ടൺ ഡിസിയിലേക്ക് പോകുന്ന മുഖ്യമന്ത്രി ലോകബാങ്കിന്റെ സൗത്ത് ഏഷ്യ റീജിയണൽ വൈസ് പ്രസിഡന്റ് മാർട്ടിൻ റൈസറുമായി കൂടിക്കാഴ്ച നടത്തും. ജൂൺ 13ന് മേരിലാൻഡിലെ മാലിന്യ സംസ്‌കരണ സംവിധാനങ്ങൾ അദ്ദേഹം നേരിട്ട് കണ്ട് മനസ്സിലാക്കും. തുടർന്ന് ജൂൺ 14ന് പിണറായി വിജയൻ ന്യൂയോർക്കിൽ നിന്ന് ഹവാനയിലേക്ക് പോകും.

ഹവാനയിൽ ജൂൺ 15 മുതൽ 16 വരെ മുഖ്യമന്ത്രി വിവിധ പരിപാടികളിൽ പങ്കെടുക്കുകയും നിരവധി പ്രമുഖരുമായി ഇടപഴകുകയും ചെയ്യും. ജോസ് മാർട്ടിയുടെ സ്മാരകം ഉൾപ്പെടെയുള്ള ചരിത്ര പ്രാധാന്യമുള്ള സ്ഥലങ്ങളും അദ്ദേഹം സന്ദർശിക്കും