തിരുവനന്തപുരം :“പോറ്റിയെ കേറ്റിയേ” എന്ന പേരിൽ പ്രചരിച്ച പാരഡി ഗാനത്തിനെതിരെ കേരള പോലീസ് കേസ് രജിസ്റ്റർ ചെയ്തു. ശബരിമല അയ്യപ്പന്റെ പ്രശസ്ത ഭക്തിഗാനമായ “സ്വാമിയേ അയ്യപ്പോ” എന്ന ഗാനത്തിന്റെ ഈണത്തിൽ തയ്യാറാക്കിയ ഈ പാരഡി ഗാനം മതവികാരം വ്രണപ്പെടുത്തുന്നതാണെന്ന പരാതിയെ തുടർന്നാണ് നടപടി.
ശബരിമല സ്വർണ്ണ മോഷണക്കേസിലെ പ്രതിയായ ഉണ്ണികൃഷ്ണൻ പോറ്റിയെ പരാമർശിച്ചുകൊണ്ടുള്ളതാണ് ഗാനം. അയ്യപ്പ ഭക്തരുടെ വിശ്വാസങ്ങളെയും ശബരിമലയുടെ പവിത്രതയെയും അപമാനിക്കുന്ന തരത്തിലുള്ള ഉള്ളടക്കമാണ് ഗാനത്തിലുണ്ടെന്നാരോപിച്ചാണ് പരാതി നൽകിയത്.

തിരുവമ്പാടി പാത സംരക്ഷണ സമിതി ജനറൽ സെക്രട്ടറി പ്രശാന്ത് കുഴിക്കാല സംസ്ഥാന പോലീസ് മേധാവിക്ക് (DGP) നൽകിയ പരാതിയുടെ അടിസ്ഥാനത്തിൽ തിരുവനന്തപുരം സൈബർ പോലീസ് സ്റ്റേഷനിൽ കേസെടുത്തു.

ഇന്ത്യൻ ശിക്ഷാ നിയമത്തിന്റെ (ഭാരതീയ ന്യായ സംഹിത) സെക്ഷൻ 299 (മതവികാരം വ്രണപ്പെടുത്താൻ ഉദ്ദേശിച്ചുള്ള ബോധപൂർവമായ പ്രവൃത്തികൾ), സെക്ഷൻ 353 (പൊതുജനദ്രോഹകരമായ പ്രസ്താവനകൾ) എന്നിവ ഉൾപ്പെടെയുള്ള വകുപ്പുകളാണ് ചുമത്തിയിരിക്കുന്നത്.
ഗാനത്തിന്റെ രചയിതാവ്, സംഗീത സംവിധായകൻ, ഗായകൻ, കൂടാതെ ഗാനം പ്രചരിപ്പിച്ചവർ എന്നിവരുൾപ്പെടെ കണ്ടാൽ അറിയാവുന്ന നാല് പേർക്കെതിരെയാണ് കേസ്. എഫ്ഐആറിൽ ഗാനരചന ചെയ്തത് കുഞ്ഞബ്ദുള്ള ചാലപ്പുറം ആണെന്ന് രേഖപ്പെടുത്തിയിട്ടുണ്ട്.

തദ്ദേശ സ്വയംഭരണ തിരഞ്ഞെടുപ്പ് പ്രചാരണത്തിനിടെ യുഡിഎഫും ബിജെപിയും ഈ പാരഡി ഗാനം ഉപയോഗിച്ചതോടെയാണ് വിഷയം കൂടുതൽ ശ്രദ്ധ നേടിയത്. തിരഞ്ഞെടുപ്പിൽ പരാജയം സംഭവിച്ചതിന് പിന്നാലെ സിപിഎം നേതാക്കൾ ഈ വിഷയത്തിൽ പരാതി ഉന്നയിച്ചതോടെ സംഭവം രാഷ്ട്രീയ വിവാദമായും മാറുകയായിരുന്നു.