കെഎസ്യു കൊല്ലം ജില്ലാ പ്രസിഡന്റ് അൻവർ സുൽഫിക്കർ ഫേസ്ബുക്കിൽ പങ്കുവച്ച വിമർശനാത്മക പോസ്റ്റ് കോൺഗ്രസിലും യുഡിഎഫിലും വലിയ വിവാദങ്ങൾക്ക് തിരികൊളുത്തി. കൊട്ടാരക്കര നിയോജക മണ്ഡലത്തിൽ യുഡിഎഫിന് നേരിട്ട തെരഞ്ഞെടുപ്പ് തിരിച്ചടിക്ക് കാരണം ഒരു “ദേശീയ നേതാവും അദ്ദേഹത്തിന്റെ ശിങ്കിടികളും” ആണെന്ന ആരോപണമാണ് പോസ്റ്റിന്റെ കേന്ദ്രബിന്ദു.
സംസ്ഥാനത്തുടനീളം യുഡിഎഫിന് അനുകൂലമായ തരംഗമുണ്ടായിട്ടും കൊട്ടാരക്കരയിൽ മാത്രം പാർട്ടി തകർച്ച നേരിട്ടുവെന്നാണ് അൻവർ സുൽഫിക്കറിന്റെ ആരോപണം. ജനങ്ങൾക്ക് ആവശ്യമില്ലാത്ത ഒരു ദേശീയ നേതാവാണ് ഇതിന് പിന്നിലെന്നും, അദ്ദേഹത്തെ സഹായിക്കുന്നവരുടെ ഇടപെടലുകളാണ് പരാജയത്തിലേക്ക് നയിച്ചതെന്നും പോസ്റ്റിൽ വിമർശിക്കുന്നു. തങ്ങൾക്ക് ഇഷ്ടമില്ലാത്തവരെ, ജയിക്കുമെന്ന് ഉറപ്പുണ്ടായാലും പരാജയപ്പെടുത്താൻ ശ്രമിക്കുന്ന ഒരു നയമാണ് ഇവർ നടപ്പാക്കുന്നതെന്നും അൻവർ സുൽഫിക്കർ ആരോപിച്ചു.
പാർട്ടിക്കായി കഷ്ടപ്പെടുന്ന ചെറുപ്പക്കാരെ രാഷ്ട്രീയമായി ഇല്ലാതാക്കുന്ന പ്രവൃത്തികളാണ് കൊടിക്കുന്നിൽ സുരേഷ് എംപിയുടെ ഭാഗത്തുനിന്ന് ഉണ്ടാകുന്നതെന്ന ഗുരുതര ആരോപണവും പോസ്റ്റിലുണ്ട്. ഈ വിമർശനങ്ങൾ പാർട്ടിക്കുള്ളിൽ വലിയ ചർച്ചകൾക്കും ഭിന്നതകൾക്കും ഇടയാക്കി.
വിവാദം ശക്തമായതോടെ അൻവർ സുൽഫിക്കറിനെതിരെ കർശന നടപടി സ്വീകരിക്കണമെന്ന് കൊടിക്കുന്നിൽ സുരേഷ് എംപി പാർട്ടി നേതൃത്വത്തോട് ആവശ്യപ്പെട്ടു. അതേസമയം, ഇതിന് പിന്നാലെ യൂത്ത് കോൺഗ്രസ് സംസ്ഥാന സെക്രട്ടറി അജു ജോർജ് കൊടിക്കുന്നിൽ സുരേഷിനെതിരെ പരോക്ഷ വിമർശനവുമായി രംഗത്തെത്തിയതോടെ കോൺഗ്രസിനുള്ളിലെ അഭിപ്രായ ഭിന്നത കൂടുതൽ പ്രകടമായി.
സംഭവത്തിൽ പാർട്ടി നേതൃത്വം എന്ത് നിലപാട് സ്വീകരിക്കുമെന്നത് ഉറ്റുനോക്കുകയാണ് കോൺഗ്രസ്-യുഡിഎഫ് ക്യാമ്പുകൾ.
