തിരുവനന്തപുരം: സംസ്ഥാനത്ത് അനുഭവപ്പെട്ട ശക്തമായ കാറ്റിലും അതിശക്തമായ മഴയിലും വൈദ്യുതി വിതരണ സംവിധാനത്തിന് കനത്ത നഷ്ടമുണ്ടായതായി കെ.എസ്.ഇ.ബി. അറിയിച്ചു. ലഭ്യമായ പ്രാഥമിക കണക്കുകൾ പ്രകാരം ഏകദേശം 26 കോടി 89 ലക്ഷം രൂപയുടെ നഷ്ടമാണ് കണക്കാക്കുന്നത്.
257 ഹൈടെൻഷൻ പോസ്റ്റുകളും 2,505 ലോ ടെൻഷൻ പോസ്റ്റുകളും തകർന്നതോടെ വൈദ്യുതി വിതരണം സാരമായി ബാധിച്ചു. 7,12,679 ഉപഭോക്താക്കൾക്ക് വൈദ്യുതി ബന്ധം തടസ്സപ്പെട്ടു. ഇവരിൽ 5,39,976 ഉപഭോക്താക്കൾക്ക് ഇതിനോടകം വൈദ്യുതി പുനഃസ്ഥാപിച്ചിട്ടുണ്ട് എന്നും കെഎസ്ഇബി അറിയിച്ചു.ബാക്കിയുള്ള വൈദ്യുതി തകരാറുകൾ പരിഹരിക്കാനുള്ള ഊർജ്ജിത ശ്രമം സംസ്ഥാന വ്യാപകമായി നടക്കുന്നുണ്ടെന്നും ഉപഭോക്താക്കൾ സഹകരിക്കണമെന്നും കെഎസ്ഇബി അറിയിച്ചു.

വൈദ്യുതി അപകടമോ അപകടസാധ്യതയോ കണ്ടുവരുന്നപക്ഷം സമീപത്തെ സെക്ഷൻ ഓഫീസുകളിലോ 9496010101 എന്ന എമർജൻസി നമ്പറിലോ ഉടൻ അറിയിക്കേണ്ടതുണ്ട്. കൂടാതെ പരാതി നൽകാൻ 1912 എന്ന ടോൾ ഫ്രീ നമ്പറും ഉപയോഗിക്കാവുന്നതാണ്.