2024-നപ്പുറം ക്ലബ്ബുമായിട്ടുള്ള തൻ്റെ കരാർ നീട്ടില്ലെന്ന് കൈലിയൻ എംബാപ്പെ പാരീസ് സെന്റ് ജെർമെയ്‌നെ (പിഎസ്ജി) അറിയിച്ചതായി റിപ്പോർട്ടുകൾ സൂചിപ്പിക്കുന്നു. റയൽ മാഡ്രിഡ് ഒടുവിൽ
വിടവാങ്ങിയ കരീം ബെൻസെമയ്ക്ക് പകരക്കാരനായി എംബാപ്പെയുടെ സേവനം ഉറപ്പാക്കിയേക്കുമെന്ന ഊഹാപോഹങ്ങൾക്ക് ഈ സംഭവവികാസങ്ങൾ വഴിയൊരുക്കി. കഴിഞ്ഞ വർഷം, എംബാപ്പെ റയൽ മാഡ്രിഡിൽ ചേരുന്നതിന് അടുത്ത് എത്തിയെങ്കിലും ഒടുവിൽ പിഎസ്ജിയുമായി ഒരു പുതിയ കരാർ ഒപ്പിട്ടു. എന്നിരുന്നാലും തന്റെ കരാർ അടുത്ത വേനൽക്കാലത്ത് അവസാനിക്കുമ്പോൾ ക്ലബ് വിടാൻ ആഗ്രഹിക്കുന്നുവെന്ന് കാണിച്ച് എംബാപ്പെ പിഎസ്ജിക്ക് ഒരു കത്ത് അയച്ചതായി റിപ്പോർട്ടുണ്ട്.
24 കാരനായ ഫ്രഞ്ച് ഇന്റർനാഷണൽ കഴിഞ്ഞ വർഷം പിഎസ്ജിയുമായി ഒരു പുതിയ രണ്ട് വർഷത്തെ കരാർ ഒപ്പിട്ടിരുന്നു. അത് 2024 ജൂണിൽ അവസാനിക്കുമ്പോൾ ഒരു വർഷം കൂടി വേണമെങ്കിൽ കരാർ നീട്ടാം എന്ന ഓപ്‌ഷനോടെയാണ്. എന്നാൽ എംബാപ്പെ
അവസാന വർഷം താൻ തുടരില്ലെന്നും അതിനാൽ അടുത്ത വേനൽക്കാലത്ത് ക്ലബ് വിടാൻ തനിക്ക് സ്വാതന്ത്ര്യമുണ്ടെന്നും
പിഎസ്ജിയോട് പറഞ്ഞതായി ന്യൂയോർക്ക് ടൈംസ് റിപ്പോർട്ട് ചെയ്തു.
ദ ന്യൂയോർക്ക് ടൈംസ് പറയുന്നതനുസരിച്ച്, എംബാപ്പെയുടെ തീരുമാനത്തിന്റെ അർത്ഥം അടുത്ത സീസണിന്റെ അവസാനത്തിൽ അദ്ദേഹത്തിന് സൗജന്യമായി പിഎസ്ജി വിടാം എന്നാണ്. 2024 ജനുവരി മുതൽ, ഫ്രാൻസിന് പുറത്തുള്ള ക്ലബ്ബുകളുമായി കരാറിന് മുമ്പുള്ള ചർച്ചകളിൽ ഏർപ്പെടാനും അദ്ദേഹത്തിന് അർഹതയുണ്ട്. ട്രാൻസ്ഫർ ഫീ ലഭിക്കാതെ താരത്തെ നഷ്ടമാകാതിരിക്കാൻ നിലവിലെ ട്രാൻസ്ഫർ വിൻഡോയിൽ താരത്തെ വിൽക്കുന്നത് പരിഗണിക്കാൻ ഈ സാഹചര്യം പിഎസ്ജിയിൽ സമ്മർദ്ദം ചെലുത്തുന്നു.
കഴിഞ്ഞ വർഷം, പിഎസ്ജിയിൽ തുടരാനുള്ള എംബാപ്പെയുടെ തീരുമാനം പലരെയും അത്ഭുതപ്പെടുത്തി, കാരണം അദ്ദേഹം റയൽ മാഡ്രിഡിലേക്ക് മാറാൻ സാധ്യതയുണ്ട് എന്ന് എല്ലാവരും കരുതിയിരുന്നു. ട്വിറ്റർ അക്കൗണ്ടുകളിലൂടെ എംബാപ്പെ ഉൾപ്പെടെയുള്ള സ്വന്തം കളിക്കാരെ വിമർശിക്കാൻ ഒരു കമ്പനിയെ നിയമിക്കുന്നത് പോലുള്ള പിഎസ്ജിയുടെ വിവാദ നടപടികളുടെ പശ്ചാത്തലത്തിൽ വേണം എംബാപ്പെയുടെ ഈ നീക്കത്തെ മനസ്സിലാക്കാൻ. മുൻ ലോകകപ്പിൽ ഫ്രാൻസിനായി എംബാപ്പെ മികച്ച പ്രകടനം കാഴ്ച്ച വച്ചിരുന്നു, അദ്ദേഹം ഗോൾഡൻ ബൂട്ട് നേടുകയും അർജന്റീനയ്‌ക്കെതിരെ അവിസ്മരണീയമായ ഹാട്രിക് നേടുകയും ചെയ്തു.ഇത് ഒരു പ്രധാന കളിക്കാരനെന്ന നിലയിലുള്ള അദ്ദേഹത്തിന്റെ പദവി കൂടുതൽ ഉയർത്തി.
റയൽ മാഡ്രിഡ് പ്രസിഡന്റ് ഫ്ലോറന്റിനോ പെരസ് എംബാപ്പെയെ ടീമിലെടുക്കുമെന്ന് പറഞ്ഞതിന് പിന്നാലെയാണ് പിഎസ്ജി വിടാനുള്ള എംബാപ്പെയുടെ ആഗ്രഹവും വെളിപെടുത്തിയത് . കഴിഞ്ഞ വർഷം എംബാപ്പെ തീരുമാനം മാറ്റിയതിനെ തുടർന്ന് ബന്ധങ്ങൾ വഷളായെങ്കിലും, എംബാപ്പെയും റയൽ മാഡ്രിഡും ആ പിണക്കം മാറ്റിവയ്ക്കാൻ തയ്യാറായേക്കാം.
