തിരുവനന്തപുരം:ജനുവരി 2026 മാസത്തിൽ ട്രാക്ക് അറ്റകുറ്റപ്പണികളുടെ ഭാഗമായി തിരുവനന്തപുരം ഡിവിഷനിൽ ചില ട്രെയിൻ സർവീസുകളുടെ പ്രവർത്തന മാതൃകയിൽ മാറ്റങ്ങൾ വരുത്തിയതായി തെക്കൻ റെയിൽവേ അറിയിച്ചു.

പരിഷ്കരിച്ച ക്രമീകരണപ്രകാരം, ട്രെയിൻ നമ്പർ 16128 ചെന്നൈ എഗ്മോർ – ഗുരുവായൂർ എക്‌സ്പ്രസ് ജനുവരി 7, 8, 9, 10, 12, 13, 14, 15, 16, 17, 19, 20, 21, 22, 23, 24, 26, 27 (2026) തീയതികളിൽ സർവീസുകൾ കോട്ടയം വഴി വഴിതിരിച്ച് ഓടും. ഇതോടെ എറണാകുളം ജംഗ്ഷൻ, ചേർത്തല, ആലപ്പുഴ, ഹരിപ്പാട് സ്റ്റേഷനുകളിലെ സ്റ്റോപ്പേജുകൾ ഒഴിവാക്കും. യാത്രക്കാരുടെ സൗകര്യാർത്ഥം കോട്ടയം, ചങ്ങനാശ്ശേരി, തിരുവല്ല, ചെങ്ങന്നൂർ സ്റ്റേഷനുകളിൽ അധിക സ്റ്റോപ്പേജുകൾ അനുവദിക്കും.

അതേസമയം, ട്രെയിൻ നമ്പർ 22207 ഡോ. എം.ജി.ആർ. ചെന്നൈ സെൻട്രൽ – തിരുവനന്തപുരം സെൻട്രൽ എ.സി. സൂപ്പർഫാസ്റ്റ് എക്‌സ്പ്രസ് ജനുവരി 9, 16, 23 (2026) തീയതികളിൽ സർവീസുകൾ കോട്ടയം വഴി തിരിച്ചുവിടൽ ഉണ്ടായിരിക്കും. ഈ ദിവസങ്ങളിൽ എറണാകുളം ജംഗ്ഷൻ, ആലപ്പുഴ സ്റ്റേഷനുകളിലെ സ്റ്റോപ്പേജുകൾ ഒഴിവാക്കുകയും എറണാകുളം ടൗൺ, കോട്ടയം, ചെങ്ങന്നൂർ സ്റ്റേഷനുകളിൽ അധിക സ്റ്റോപ്പേജുകൾ അനുവദിക്കുകയും ചെയ്യും.