2021 നവംബർ മുതൽ സെൻട്രൽ എക്സൈസ് തീരുവ കുറച്ചതുൾപ്പെടെയുള്ള നടപടികളുടെ ഒരു പരമ്പരയെ തുടർന്ന് ഡൽഹിയിൽ പെട്രോൾ വില ലിറ്ററിന് 94.77 രൂപയായും ഡീസൽ വില ലിറ്ററിന് 87.67 രൂപയായും കുറഞ്ഞതായി സർക്കാർ പറഞ്ഞു.

 ഉപഭോക്താക്കൾക്ക് ന്യായമായ  ഇന്ധന വില ഉറപ്പാക്കാൻ സർക്കാർ സജീവമായി പ്രവർത്തിക്കുന്നുണ്ടെന്ന് പെട്രോളിയം പ്രകൃതി വാതക സഹമന്ത്രി സുരേഷ് ഗോപി ലോക്‌സഭയിൽ രേഖാമൂലം നൽകിയ മറുപടിയിൽ പറഞ്ഞു.  പെട്രോൾ, ഡീസൽ എന്നിവയുടെ വില 2021 നവംബറിലെ ഏറ്റവും ഉയർന്ന വിലയായ യഥാക്രമം ലിറ്ററിന് ₹110.04, ₹98.42 എന്നിവയിൽ നിന്ന് ഗണ്യമായ കുറവുണ്ടായി.  2021 നവംബറിലും പിന്നീട് 2022 മെയ് മാസത്തിലും രണ്ട് ഘട്ടങ്ങളിലായി പെട്രോൾ ലിറ്ററിന് 13 രൂപയും ഡീസലിന് ലിറ്ററിന് 16 രൂപയും എക്സൈസ് തീരുവ വെട്ടിക്കുറച്ചതിന് ശേഷമാണ് സർക്കാർ ഈ കുറവ് വരുത്തിയത്.

 കൂടാതെ, പല സംസ്ഥാന ഗവൺമെൻ്റുകളും ഇന്ധനത്തിൻ്റെ മൂല്യവർദ്ധിത നികുതി (വാറ്റ്) കുറച്ചുകൊണ്ട് പൗരന്മാരുടെ ഭാരം കുറച്ചു.  2024 മാർച്ചിൽ പെട്രോളിൻ്റെയും ഡീസലിൻ്റെയും ചില്ലറ വിൽപ്പന വില ലിറ്ററിന് 2 രൂപ കുറച്ചതിലൂടെ എണ്ണ വിപണന കമ്പനികളും വില കുറയ്ക്കുന്നതിന് സംഭാവന നൽകി.

 അന്താരാഷ്‌ട്ര ക്രൂഡ് ഓയിൽ വിലയിലെ ചാഞ്ചാട്ടത്തിൽ നിന്ന് പൗരന്മാരെ സംരക്ഷിക്കാൻ സർക്കാർ കൂടുതൽ നടപടികൾ സ്വീകരിച്ചിട്ടുണ്ടെന്ന് ശ്രീ ഗോപി പറഞ്ഞു.  രാജ്യത്തിൻ്റെ ക്രൂഡ് ഓയിൽ ഇറക്കുമതി  വൈവിധ്യവത്കരിക്കുക, ആഭ്യന്തര വില സ്ഥിരപ്പെടുത്തുന്നതിന് പെട്രോളിയം ഉൽപന്ന കയറ്റുമതിയിൽ  നികുതി ചുമത്തുക എന്നിവ ഇതിൽ ഉൾപ്പെടുന്നു.