ഇന്ത്യയുടെ പരോക്ഷ നികുതി ഘടനയിൽ വലിയ മാറ്റങ്ങൾ വരുത്തിയ ജി.എസ്.ടി കൗൺസിൽ തീരുമാനങ്ങൾ സെപ്റ്റംബർ 22 മുതൽ പ്രാബല്യത്തിൽ വരും. പുതുക്കിയ സംവിധാനത്തിൽ പ്രധാനമായും 5 ശതമാനം, 18 ശതമാനം, കൂടാതെ ‘സിൻ-ലക്ഷ്വറി’ ഉൽപ്പന്നങ്ങൾക്ക് 40 ശതമാനം എന്നിങ്ങനെ മൂന്ന് സ്ലാബുകളാണ്.

ദൈനംദിന ഉപയോഗത്തിനുള്ള വിവിധതരം വസ്തുക്കൾ വിലകുറഞ്ഞതാക്കുന്നതിലൂടെ ഈ നീക്കം കുടുംബങ്ങളുടെ ഭാരം ലഘൂകരിക്കുമെന്ന് പ്രതീക്ഷിക്കുന്നു. പലചരക്ക്, വളം, ആരോഗ്യ സംരക്ഷണ ഉൽപ്പന്നങ്ങൾ, പാദരക്ഷകൾ, തുണിത്തരങ്ങൾ, പുനരുപയോഗ ഊർജ്ജ ഉപകരണങ്ങൾ എന്നിവ ഇതിൽ ഉൾപ്പെടും

ഭക്ഷ്യവസ്തുക്കളിൽ, യുഎച്ച്ടി പാൽ നികുതി രഹിതമാകും, അതേസമയം വെണ്ണ, നെയ്യ്, പനീർ, ചീസ് എന്നിവ 12 ശതമാനത്തിൽ നിന്ന് 5 ശതമാനമായി മാറുന്നു. ഡ്രൈ ഫ്രൂട്ട്‌സ്, ബിസ്‌ക്കറ്റ്, ചോക്ലേറ്റ്, മിഠായി, പാക്കേജുചെയ്‌ത ഭക്ഷണങ്ങൾ, നംകീനുകൾ എന്നിവയും ഗണ്യമായ നിരക്ക് കുറയും. വളങ്ങൾക്കും കാർഷിക വിളകൾക്കും 5 ശതമാനമായി കുറയുന്നു, ഇത് കർഷകർക്ക് ആശ്വാസം നൽകുന്നു.

ആരോഗ്യ മേഖലക്കും വലിയ ഉത്തേജനം ലഭിച്ചു. ജീവൻ രക്ഷാ മരുന്നുകൾ, മെഡിക്കൽ ഉപകരണങ്ങൾ, ഇൻഷുറൻസ് പ്രീമിയങ്ങൾ തുടങ്ങിയവയ്ക്ക് 5 ശതമാനം അല്ലെങ്കിൽ പൂർണ്ണമായും നികുതി ഒഴിവാക്കിയിട്ടുണ്ട്. ചെരുപ്പുകൾ വസ്ത്രങ്ങൾ എന്നീ  ഉപഭോക്തൃ  ഉൽപ്പന്നങ്ങൾക്ക് വില കുറയും.

അതേസമയം, സിൻ ഗുഡ്സ് ഉൽപ്പന്നങ്ങൾ അഥവാ പാൻമസാല, ഗുട്ട്ക, സിഗരറ്റ്, മറ്റു പുകയില എന്നിവയ്ക്ക് ഉയർന്ന നികുതി തുടരും. ഇവയുടെ മൂല്യനിർണ്ണയം ഇപ്പോൾ റീട്ടെയിൽ സെയിൽ പ്രൈസ് (RSP) അടിസ്ഥാനത്തിലായിരിക്കും. കൂടാതെ, പഞ്ചസാര ചേർത്ത ശീതളപാനീയങ്ങൾ, പ്രീമിയം മദ്യങ്ങൾ, ലക്സറി കാറുകൾ തുടങ്ങിയവയ്ക്ക് 40 ശതമാനം ജി.എസ്.ടി നിരക്ക് ബാധകമാകും.

പുതിയ നിരക്കുകൾ സാധനങ്ങളുടെ ഉപഭോഗം വർധിപ്പിച്ച് സമ്പദ്‌വ്യവസ്ഥയ്ക്ക് ഉത്തേജനം നൽകുമെന്ന് സർക്കാർ പ്രതീക്ഷിക്കുന്നു.