ആരെയും ആലോചനയില്ലാതെ ‘ഫാസിസ്റ്റ്’ അല്ലെങ്കിൽ ‘നാസി’ എന്ന് മുദ്രകുത്തുന്നത് കൊലപാതകത്തിന് പ്രേരണക്കുറ്റമായേക്കാമെന്ന് ടെക്‌ബില്യണറും ‘എക്സ്’ ഉടമയുമായ ഏലൺ മസ്‌ക് പറഞ്ഞു. അമേരിക്കയിൽ നടന്ന രണ്ട് ഞെട്ടിപ്പിക്കുന്ന കൊലപാതകങ്ങൾക്കൊടുവിലാണ് ഈ വിവാദ പ്രസ്താവന.

‘എക്സ്’ പ്ലാറ്റ്‌ഫോമിൽ പോസ്റ്റ് ചെയ്ത സന്ദേശത്തിൽ,  ആളുകളെ തെറ്റായി അതിക്രമവാദികളായി ചിത്രീകരിക്കുന്നത്, അവർക്കെതിരായ അതിക്രമത്തെ ന്യായീകരിക്കാൻ അനുകൂല സാഹചര്യം സൃഷ്ടിക്കുന്നതായി മസ്‌ക് ചൂണ്ടിക്കാട്ടി. ഈ വാദത്തിന് അടിസ്ഥാനമായി അദ്ദേഹം ഉറ്റയിലെ ഓറം നഗരത്തിൽ സെപ്റ്റംബർ 10-ന് നടന്ന കൺസർവറ്റീവ് പ്രവർത്തകൻ ചാർലി കിർക്കിന്റെ വധത്തെ ഉദ്ധരിച്ചു.  കർക്കിന്റെ കൊലപാതകം നടന്ന  സ്ഥലത്ത് “ഹേ ഫാസിസ്റ്റ്! ഇതാ പിടിച്ചോ?” പോലുള്ള ആന്റിഫാസിസ്റ്റ് സന്ദേശങ്ങൾ കൊത്തിയ ബുള്ളറ്റ് ഷെല്ലുകൾ പൊലീസ് കണ്ടെത്തിയിരുന്നു .
മസ്‌ക് ചൂണ്ടിക്കാട്ടിയ മറ്റൊരു സംഭവം വൈറ്റ് ഹൗസിന് സമീപം ചൊവ്വാഴ്ച നടന്ന ആക്രമണമാണ്. ഒരു അഫ്ഗാൻ കുടിയേറ്റക്കാരനാണ് രണ്ട് വെസ്റ്റ് വിർജീനിയ നാഷണൽ ഗാർഡ് അംഗങ്ങളെ വെടിവെച്ചുകൊലപ്പെടുത്തിയത്. രാഷ്ട്രീയ പ്രേരിതമായിരിക്കാമെന്ന് അന്വേഷണ ഏജൻസികൾ വിലയിരുത്തുന്ന ഈ ആക്രമണവും രാജ്യത്തെ രാഷ്ട്രീയ അതിക്രമത്തെ കുറിച്ചുള്ള ആശങ്ക കൂടുതൽ ശക്തമാക്കുകയാണ്.

മസ്‌കിന്റെ മുന്നറിയിപ്പ് ഉടൻ തന്നെ രാഷ്ട്രീയ വിവാദങ്ങൾക്ക് വഴിവച്ചു. കൺസർവറ്റീവ് നേതാക്കളും അനുയായികളും അദ്ദേഹത്തിന്റെ അഭിപ്രായത്തെ പിന്തുണച്ച്, രാഷ്ട്രീയ എതിരാളികളെ അത്യന്തം അപകടകരമായ ശത്രുക്കളാക്കുന്ന രീതിയിൽ വിളിപ്പേരുകൾ ഉപയോഗിക്കുന്നതാണു അതിക്രമവർധനയ്ക്ക് കാരണമെന്ന് വാദിച്ചു.
അതേ സമയം വിമർശകർ പറയുന്നത്, രാഷ്ട്രീയ അഭിപ്രായവ്യത്യാസങ്ങളിൽ ഉപയോഗിക്കുന്ന ഭാഷയെ നിയന്ത്രിക്കാൻ ശ്രമിക്കുന്നതിലൂടെ മസ്‌ക് അഭിപ്രായ സ്വാതന്ത്ര്യത്തെ ഭീഷണിപ്പെടുത്തുകയാണെന്നും. ഏതാനും വാക്കുകളെ തന്നെ ‘പ്രേരണക്കുറ്റം’ എന്നു കണക്കാക്കുന്നത് വിമർശനങ്ങളെയും പ്രതികരണങ്ങളെയും അടിച്ചമർത്താനുള്ള ശ്രമമാകാമെന്ന ആശങ്കയും അവർ ഉയർത്തുന്നു.

അമേരിക്കയിലെ രാഷ്ട്രീയ അന്തരീക്ഷം ശക്തമായ ധ്രുവീകരണത്തിലൂടെ കടന്നുപോകുന്ന പശ്ചാത്തലത്തിലാണിത്. മുൻ പ്രസിഡന്റ് ഡൊണാൾഡ് ട്രംപിനെതിരായ ആക്രമണം ഉൾപ്പെടെ പല രാഷ്ട്രീയ വ്യക്തികളെയും സൈനികരെയും ലക്ഷ്യമിട്ടുകൊണ്ടുള്ള അതിക്രമങ്ങളിൽ വർധനവ് റിപ്പോർട്ട് ചെയ്യപ്പെട്ടിട്ടുണ്ട്. ചര്‍ച്ചകള്‍ കൂടുതല്‍ തീവ്രമാകുകയും വര്‍ഗ്ഗീയതയും വിദ്വേഷവും കലര്‍ന്ന ഭാഷ സാധാരണമാവുകയും ചെയ്ത സാഹചര്യത്തിലാണ് മസ്‌കിന്റെ പരാമര്‍ശം