കോഴിക്കോട് ജില്ലയിൽ നിപ സമ്പർക്കപ്പട്ടികയിൽ 115 പേരുണ്ടെന്ന് ആരോഗ്യമന്ത്രി വീണാ ജോര്‍ജ് അറിയിച്ചു. സംസ്ഥാനത്തെ വിവിധ ജില്ലകളിലായി ആകെ 675 പേരാണ് സമ്പർക്കപ്പട്ടികയിൽ ഉള്ളത്. ഇതിൽ 178 പേർ പാലക്കാട് റിപ്പോർട്ട് ചെയ്ത രണ്ടാം കേസിന്റെ സമ്പർക്കപ്പട്ടികയിൽ ഉൾപ്പെട്ടവരാണ്.

മറ്റു ജില്ലകളിൽ മലപ്പുറം 210, പാലക്കാട് 347, എറണാകുളം 2, തൃശൂർ 1 എന്നിങ്ങനെയാണ് സമ്പർക്കപ്പട്ടികയിലെ നിരക്ക്. മലപ്പുറത്ത് ഇതുവരെ 82 സാമ്പിളുകൾ നെഗറ്റീവ് ആയി. ഒരാൾ ഐസിയുവിൽ ചികിത്സയിൽ തുടരുകയാണ്. പാലക്കാട് 12 പേർ ഐസൊലേഷനിൽ ചികിത്സയിലുണ്ട്, 5 പേർക്ക് ഡിസ്ചാർജ് നൽകിയിട്ടുണ്ട്.
സംസ്ഥാനത്ത് ആകെ 38 പേർ ഹൈയസ്റ്റ് റിസ്‌ക് വിഭാഗത്തിലും 139 പേർ ഹൈ റിസ്‌ക് വിഭാഗത്തിലും നിരീക്ഷണത്തിലാണെന്നും മന്ത്രി വ്യക്തമാക്കി.

മന്ത്രിയുടെ നേതൃത്വത്തിൽ ചേർന്ന ഉന്നതതല യോഗത്തിൽ ആരോഗ്യവകുപ്പ് അഡീഷണൽ ചീഫ് സെക്രട്ടറി, എൻ.എച്ച്.എം. സ്റ്റേറ്റ് മിഷൻ ഡയറക്ടർ, ആരോഗ്യവകുപ്പ് ഡയറക്ടർ, മെഡിക്കൽ വിദ്യാഭ്യാസ ഡയറക്ടർ, അഡീഷണൽ ഡയറക്ടർമാർ, വിവിധ ജില്ലകളിലെ കളക്ടർമാർ, ജില്ലാ മെഡിക്കൽ ഓഫീസർമാർ, പോലീസ് ഉദ്യോഗസ്ഥർ തുടങ്ങിയവർ പങ്കെടുത്തു.