ഇലക്ട്രിക് വാഹനങ്ങൾ (ഇവികൾ) പ്രോത്സാഹിപ്പിക്കുന്നതിന് ഇന്ത്യയ്ക്ക് ഇനി സബ്‌സിഡി ആവശ്യമില്ലെന്ന് കേന്ദ്ര റോഡ് ഗതാഗത, ഹൈവേ മന്ത്രി നിതിൻ ഗഡ്കരി പറഞ്ഞു.ബ്ലൂംബർഗ് എൻഇഎഫ് സമ്മേളനത്തിൽ പങ്കെടുത്തു സംസാരിക്കുകയായിരുന്നു മന്ത്രി
“ഇലക്ട്രിക് വാഹനങ്ങളുടെ ചരക്ക് സേവന നികുതി (ജിഎസ്ടി) പെട്രോൾ, ഡീസൽ വാഹനങ്ങൾക്ക് ഈടാക്കുന്ന 28 ശതമാനവുമായി താരതമ്യപ്പെടുത്തുമ്പോൾ വെറും 5% മാത്രമാണ്. ഇത് തന്നെ ഇവികളിലേക്ക് മാറുന്നതിന് ഉപഭോക്താക്കൾക്ക് ഒരു പ്രധാന പ്രോത്സാഹനമാണ്,” ഗഡ്കരി പറഞ്ഞു.
ചാർജിംഗ് നെറ്റ്‌വർക്കുകൾ വർധിപ്പിക്കുക, ഈ മേഖലയിലെ നിക്ഷേപം പ്രോത്സാഹിപ്പിക്കുക തുടങ്ങിയ ഇവികൾക്ക് കൂടുതൽ ശക്തമായ അടിസ്ഥാന സൗകര്യങ്ങൾ നിർമ്മിക്കുന്നതിലേക്ക് സബ്‌സിഡിയിൽ നിന്ന് ഇപ്പോൾ ശ്രദ്ധ മാറേണ്ടതുണ്ടെന്നും അദ്ദേഹം സൂചിപ്പിച്ചു. ഇന്ത്യയ്ക്ക് ഉടൻ തന്നെ മികച്ച ഇവി ചാർജിംഗ് പോയിൻ്റ് ഇൻഫ്രാസ്ട്രക്ചർ ഉണ്ടാകുമെന്നും അദ്ദേഹം കൂട്ടിച്ചേർത്തു.
ട്രക്കിംഗ് മേഖലയെ ഡികാർബണൈസ് ചെയ്യാനുള്ള ശ്രമത്തിലാണ് മന്ത്രാലയം എന്നും ഗഡ്കരി പറഞ്ഞു.ഹൈവേകളിലെ ബസ് സ്റ്റോപ്പുകളിൽ വൈദ്യുത ചാർജിംഗ് പോയിൻ്റുകൾ ഉടൻ സ്ഥാപിക്കുമെന്നും അതിനാൽ ദീർഘദൂര ഇ-ബസുകൾക്ക് ബുദ്ധിമുട്ടുകൾ ഉണ്ടാകില്ലെന്നും അദ്ദേഹം കൂട്ടിച്ചേർത്തു
2030-ഓടെ എല്ലാ കാർ വിൽപ്പനയുടെയും 30% ഇലക്ട്രിക് വാഹനങ്ങളാക്കാനാണ് സർക്കാർ ലക്ഷ്യമിടുന്നത്, ഇന്ത്യയുടെ ഇവി വിപണി ക്രമാനുഗതമായി വളരുകയാണ്.
