മിൽക്കിവേ ഗാലക്സിയിലെ ചെറിയ, സാധാരണ കുള്ളൻ നക്ഷത്രങ്ങളെ ചുറ്റുന്ന ഏകദേശം മൂന്നിലൊന്ന് ഗ്രഹങ്ങളും വാസയോഗ്യമായ മേഘലയിലാണെന്ന് ഫ്ലോറിഡ സർവകലാശാലയിലെ ജ്യോതിശാസ്ത്രജ്ഞർ നടത്തിയ പഠനം സൂചിപ്പിക്കുന്നു.
ഈ കുള്ളൻ നക്ഷത്രങ്ങൾ നമ്മുടെ സൂര്യനേക്കാൾ വളരെ ചെറുതും തണുപ്പുള്ളതുമാണ്, കോടിക്കണക്കിന് ഗ്രഹങ്ങൾ അവയെ ചുറ്റുന്നു.

ഒരു ഗ്രഹം വാസയോഗ്യമാകണമെങ്കിൽ, മതിയായ ചൂട് ലഭിക്കുന്നതിന് അതിന്റെ നക്ഷത്രത്തോട് അടുത്ത് വേണം. എന്നിരുന്നാലും, ഈ സാമീപ്യം ഈ ഗ്രഹങ്ങളെ തീവ്രമായ വേലിയേറ്റ ശക്തികൾക്ക് വിധേയമാക്കുന്നു. ഈ ചെറിയ നക്ഷത്രങ്ങൾക്ക് ചുറ്റുമുള്ള ഗ്രഹങ്ങളിൽ മൂന്നിൽ രണ്ട് ഭാഗവും ഈ വേലിയേറ്റം മൂലം വാസയോഗ്യമല്ലാതായി തീരുമെന്ന് പഠനം വെളിപ്പെടുത്തുന്നു. എന്നിരുന്നാലും, ബാക്കിയുള്ള മൂന്നിലൊന്ന് വരുന്ന, ഗാലക്സിയിലുടനീളമുള്ള ദശലക്ഷക്കണക്കിന് ഗ്രഹങ്ങൾ, ദ്രാവക ജലം നിലനിർത്തുന്നതിനും ജീവൻ നിലനിർത്തുന്നതിനും അനുയോജ്യമായ ഒരു ഭ്രമണപഥത്തിലായിരിക്കാം, ശാസ്ത്രജ്ഞർ പറയുന്നു

ജ്യോതിശാസ്ത്ര പ്രൊഫസർ സാറാ ബല്ലാർഡിന്റെയും ഡോക്ടറൽ വിദ്യാർത്ഥിനിയായ ഷീല സഗീറിന്റെയും നേതൃത്വത്തിൽ നടന്ന ഗവേഷണം, വ്യാഴത്തിന്റെ വലുപ്പമുള്ള എം കുള്ളൻ (M dwarf) നക്ഷത്രങ്ങളെ ചുറ്റുന്ന 150-ലധികം ഗ്രഹങ്ങളെ കേന്ദ്രീകരിച്ച് പഠനം നടത്തി . കൂടുതൽ ഓവൽ ആകൃതിയിലുള്ള ഭ്രമണപഥത്തിലെ ഒരു ഗ്രഹം അതിന്റെ നക്ഷത്രത്തോട് അടുത്താണെങ്കിൽ അത് ടൈഡൽ താപനത്തിനു വിധേയമാകും. ഗുരുത്വാകർഷണബലം മാറുന്നത് ഗ്രഹത്തെ വലിച്ചുനീട്ടുകയും രൂപഭേദം വരുത്തുകയും ഘർഷണവും താപവും സൃഷ്ടിക്കുകയും ചെയ്യുമ്പോൾ അത് ദ്രാവക ജലത്തിന്റെ ഏതെങ്കിലും സാധ്യത ഇല്ലാതാക്കും. വൃത്താകൃതിയിൽ ഭ്രമണപഥമുള്ള ഗ്രഹങ്ങളിൽ ഇതിനു സാധ്യത കുറയുകയും വാസയോഗ്യത്തിന് അനുയോജ്യമാവുകയും ചെയ്യന്നു.

പഠനത്തിൽ ഉപയോഗിച്ച ഡാറ്റ നാസയുടെ കെപ്ലർ ടെലിസ്‌കോപ്പിൽ നിന്നാണ് ലഭിച്ചത്, അത് എക്സോപ്ലാനറ്റുകളെ ( സൗരയൂഥത്തിന് പുറത്ത് മറ്റ് നക്ഷത്രങ്ങളെ ഭ്രമണം ചെയ്യുന്ന ഗ്രഹങ്ങൾ ) അവയുടെ ആതിഥേയ നക്ഷത്രങ്ങൾക്ക് മുന്നിലൂടെ സഞ്ചരിക്കുമ്പോൾ നിരീക്ഷിച്ചു. ഗാലക്സിയിലെ നിരവധി നക്ഷത്രങ്ങളിലേക്കുള്ള ദൂരം അളക്കുന്ന ഗയ ടെലിസ്കോപ്പിൽ നിന്നുള്ള ഡാറ്റയും ഗവേഷകർ ഉപയോഗിച്ചു.

ഒന്നിലധികം ഗ്രഹങ്ങളുള്ള നക്ഷത്രങ്ങൾക്ക് ദ്രവജലം നിലനിർത്താൻ കഴിയുന്ന വൃത്താകൃതിയിലുള്ള ഭ്രമണപഥങ്ങൾ ഉണ്ടാകാൻ സാധ്യതയുണ്ടെന്ന് പഠനം കണ്ടെത്തി, അതേസമയം ഒരു ഗ്രഹം മാത്രമുള്ള നക്ഷത്രങ്ങൾക്ക് ഗ്രഹത്തിന്റെ ഉപരിതലത്തെ ജീവയോഗ്യമല്ലാതാക്കുന്ന തീവ്രമായ വേലിയേറ്റ ശക്തികൾ അനുഭവപ്പെടാനുള്ള സാധ്യത കൂടുതലാണ് എന്ന് പഠനം പറയുന്നു.