ലിഥിയം-അയൺ ബാറ്ററികളെക്കുറിച്ചുള്ള സുരക്ഷാ ആശങ്കകൾ ചൂണ്ടിക്കാട്ടി ദുബായ് ആസ്ഥാനമായുള്ള എയർലൈൻ എമിറേറ്റ്സ് 2025 ഒക്ടോബർ 1 മുതൽ വിമാനയാത്രയ്ക്കിടെ പവർ ബാങ്കുകൾ ഉപയോഗിക്കുന്നതും ചാർജ് ചെയ്യുന്നതും നിരോധിച്ചതായി പ്രഖ്യാപിച്ചു.
എന്നിരുന്നാലും പുതിയ നിയമപ്രകാരം, യാത്രക്കാർക്ക് ഒരു പവർബാങ്ക് മാത്രം കയ്യിൽ കൊണ്ടുപോകാം. അതിന്റെ ശേഷി 100 വാട്ട്-മണിക്കൂർ (Wh) അല്ലെങ്കിൽ അതിൽ താഴെ ആയിരിക്കണം, ശേഷി വ്യക്തമായും വായിക്കാവുന്ന രീതിയിൽ രേഖപ്പെടുത്തിയിരിക്കണം. പക്ഷേ, യാത്രയ്ക്കിടെ പവർബാങ്ക് ഉപയോഗിച്ച് മറ്റ് ഉപകരണങ്ങൾ ചാർജ് ചെയ്യാനും, അതിനെ വിമാനത്തിലെ വൈദ്യുതി ഉപയോഗിച്ച് ചാർജ് ചെയ്യാനും അനുവദിക്കില്ല. പവർബാങ്ക് സീറ്റിന്റെ പോക്കറ്റിലോ മുൻസീറ്റിന് താഴെയുള്ള ബാഗിലോ സൂക്ഷിക്കണം. മുൻപത്തെ പോലെ, പവർബാങ്ക് ചെക്ക്ഡ് ബാഗേജിൽ അനുവദനീയമല്ല.
വ്യോമയാന വ്യവസായത്തിലുടനീളം ലിഥിയം ബാറ്ററിയുമായി ബന്ധപ്പെട്ട അപകടങ്ങൾ വർദ്ധിച്ചുവരുന്ന സാഹചര്യത്തിൽ സുരക്ഷാ അവലോകനത്തെ തുടർന്നാണ് ഈ നീക്കം എന്ന് എയർലൈൻ പറഞ്ഞു. തെർമൽ റൺഅവേ, അഥവാ ബാറ്ററികൾ അമിതമായി ചൂടാകുകയും തീപിടിക്കുകയും ചെയ്യുന്ന ഒരു അവസ്ഥ, പ്രത്യേകിച്ച് വിലകുറഞ്ഞതോ അനിയന്ത്രിതമായതോ ആയ ഉപകരണങ്ങളിൽ അപകട സാധ്യത വർദ്ധിപ്പിക്കുന്നു. പവർ ബാങ്കുകൾ കൈയെത്തും ദൂരത്ത് സൂക്ഷിക്കുന്നത് അടിയന്തര സാഹചര്യങ്ങളിൽ ജീവനക്കാർക്ക് വേഗത്തിൽ പ്രതികരിക്കാൻ കഴിയുമെന്ന് ഉറപ്പാക്കുന്നുവെന്ന് എമിറേറ്റ്സ് കൂട്ടിച്ചേർത്തു.
