പദവിയിലെത്തുന്ന ആദ്യ മലയാളി
ന്യൂഡൽഹി: കേന്ദ്ര വിവരാവകാശ കമ്മീഷണറായി പി.ആർ. രമേശിനെ നിയമിച്ചു. ഈ പദവിയിലെത്തുന്ന ആദ്യ മലയാളി എന്ന പ്രത്യേകത അദ്ദേഹത്തിനുണ്ട്. കേന്ദ്ര വിവരാവകാശ കമ്മീഷനിൽ നിലവിലുണ്ടായിരുന്ന ഒഴിവുകൾ നികത്തുന്നതിനുള്ള നടപടികളുടെ ഭാഗമായാണ് നിയമനം.
മാധ്യമപ്രവർത്തന രംഗത്ത് ദീർഘകാല അനുഭവമുള്ള പി.ആർ. രമേശ് പ്രമുഖ മാധ്യമപ്രവർത്തകനാണ്. ഓപ്പൺ മാഗസിൻ്റെ മാനേജിങ് എഡിറ്ററായി അദ്ദേഹം സേവനമനുഷ്ഠിച്ചിട്ടുണ്ട്. ഇതിന് മുൻപ് ഇക്കണോമിക് ടൈംസിൻ്റെ നാഷണൽ പൊളിറ്റിക്കൽ എഡിറ്ററായും പ്രവർത്തിച്ചിട്ടുണ്ട്. രാഷ്ട്രീയവും ഭരണപരവുമായ വിഷയങ്ങളിലെ ആഴത്തിലുള്ള റിപ്പോർട്ടിംഗും വിശകലനവും അദ്ദേഹത്തെ ശ്രദ്ധേയനാക്കി.
മാധ്യമപ്രവർത്തനത്തിലെ മികവിന് പ്രേം ഭാട്ടിയ, റെഡ് ഇങ്ക് തുടങ്ങിയ പുരസ്കാരങ്ങൾ പി.ആർ. രമേശിന് ലഭിച്ചിട്ടുണ്ട്. സുതാര്യതയും ഉത്തരവാദിത്വവും ഉറപ്പാക്കുന്ന വാർത്താവിഷയങ്ങളിലൂടെയാണ് അദ്ദേഹം കൂടുതൽ ശ്രദ്ധ നേടിയത്.
പ്രധാനമന്ത്രി നരേന്ദ്ര മോദി, കേന്ദ്ര ആഭ്യന്തര മന്ത്രി അമിത് ഷാ, ലോക്സഭയിലെ പ്രതിപക്ഷ നേതാവ് എന്നിവരടങ്ങിയ ഉന്നതതല തിരഞ്ഞെടുപ്പ് സമിതിയാണ് പി.ആർ. രമേശിനെ ഈ തസ്തികയിലേക്ക് തെരഞ്ഞെടുത്തത്.
തിരുവല്ല മണ്ണൻകരച്ചിറയിലെ പുത്തൂർ കുടുംബാംഗമാണ് പി.ആർ. രമേശ്. ടൈംസ് ഓഫ് ഇന്ത്യയിലെ സീനിയർ എഡിറ്ററായ ഭാരതി ജെയ്ൻ ആണ് ഭാര്യ.
