പ്രധാനമന്ത്രി നരേന്ദ്ര മോദി ഞായറാഴ്ച പുതിയ പാർലമെന്റ് മന്ദിരം ഉദ്ഘാടനം ചെയ്ത് രാഷ്ട്രത്തിന് സമർപ്പിച്ചു. പൂജയോടെ ആരംഭിച്ച ചടങ്ങിൽ ലോക്‌സഭാ സ്പീക്കർ ഓം ബിർള പ്രധാനമന്ത്രിയെ അനുഗമിച്ചു.
പൂജയ്ക്ക് ശേഷം, പ്രധാനമന്ത്രിയും ലോക്‌സഭാ സ്പീക്കർ ബിർളയും പുതിയ ലോക്‌സഭയിലേക്ക് പ്രവേശിച്ചു, അവിടെ പ്രധാനമന്ത്രി മോദി സ്പീക്കറുടെ കസേരയ്ക്ക് സമീപം ചരിത്രപരമായ ‘ചെങ്കോൽ’ സ്ഥാപിച്ചു. പിന്നീട്, പുതിയ പാർലമെന്റ് മന്ദിരത്തിന്റെ ഉദ്ഘാടനത്തോടനുബന്ധിച്ച് പ്രധാനമന്ത്രി ഫലകം അനാച്ഛാദനം ചെയ്തു.
ഈ അവസരത്തിൽ പ്രധാനമന്ത്രി ട്വീറ്റ് ചെയ്യുകയും തന്റെ അഭിപ്രായം പങ്കുവെക്കുകയും ചെയ്തു. പുതിയ കെട്ടിടം ഇന്ത്യയെ പുതിയ ഉയരങ്ങളിലേക്ക് നയിക്കുമെന്ന് പ്രതീക്ഷിക്കുന്നതായും അദ്ദേഹം പറഞ്ഞു.
“ഇന്ത്യയുടെ പാർലമെന്റിന്റെ പുതിയ മന്ദിരം ഉദ്ഘാടനം ചെയ്യപ്പെടുമ്പോൾ, നമ്മുടെ ഹൃദയങ്ങളും മനസ്സുകളും അഭിമാനവും പ്രതീക്ഷയും വാഗ്ദാനവും കൊണ്ട് നിറഞ്ഞിരിക്കുന്നു. ഈ ഐതിഹാസികമായ കെട്ടിടം ശാക്തീകരണത്തിന്റെയും സ്വപ്നങ്ങളെ ജ്വലിപ്പിച്ച് അവയെ യാഥാർത്ഥ്യത്തിലേക്ക് നയിക്കുന്നതിൻ്റെ കളിത്തൊട്ടിലാകട്ടെ, ഒപ്പം നമ്മളെ പുരോഗതിയുടെ ഉയരങ്ങളിൽ എത്താൻ സഹായിക്കട്ടെ,” പ്രധാനമന്ത്രി ട്വീറ്റിൽ പറഞ്ഞു.
പുതിയ പാർലമെന്റ് മന്ദിരം ഉദ്ഘാടനം ചെയ്ത ശേഷം, പുതിയ പാർലമെന്റ് മന്ദിരത്തിന്റെ നിർമ്മാണത്തിൽ പങ്കാളികളായ തൊഴിലാളികളെ പ്രധാനമന്ത്രി ആദരിക്കുകയും അനുമോദിക്കുകയും ചെയ്തു.
പ്രധാനമന്ത്രി മോദി, ലോക്‌സഭാ സ്പീക്കർ ഓം ബിർള, കേന്ദ്രമന്ത്രിമാർ, വിവിധ സംസ്ഥാനങ്ങളിലെ മുഖ്യമന്ത്രിമാർ എന്നിവർ ബഹുമത പ്രാർത്ഥനാ യോഗത്തിൽ പങ്കെടുത്തു.
