രാജ്യവ്യാപകമായ സർക്കാർവിരുദ്ധ പ്രതിഷേധങ്ങൾ മൂന്നാം ആഴ്ചയിലേക്ക് കടന്ന സാഹചര്യത്തിൽ, സുരക്ഷാ ആശങ്കകളും പൂർണ്ണമായ ഇന്റർനെറ്റ് നിരോധനവും തുടരുന്നതിനാൽ നിരവധി അന്താരാഷ്ട്ര വിമാനക്കമ്പനികൾ ഇറാനിലേക്കും ഇറാനിൽ നിന്നുമുള്ള വിമാന സർവീസുകൾ റദ്ദാക്കുകയോ താൽക്കാലികമായി നിർത്തിവയ്ക്കുകയോ ചെയ്തു.

ഡിസംബർ 28ന് സാമ്പത്തിക ബുദ്ധിമുട്ടുകളെ തുടർന്നാണ് പ്രതിഷേധങ്ങൾ ആരംഭിച്ചത്. കർശനമായ സുരക്ഷാ നടപടികളും അടിച്ചമർത്തലുകളും ഉണ്ടായിട്ടും പ്രക്ഷോഭം തുടരുകയാണ്. മനുഷ്യാവകാശ സംഘടനകളുടെ കണക്കു പ്രകാരം ഇതുവരെ 45 മുതൽ 100 വരെ ആളുകൾ കൊല്ലപ്പെട്ടിട്ടുണ്ടെന്നും, അതിൽ പ്രായപൂർത്തിയാകാത്തവരും ഉൾപ്പെടുന്നതായും റിപ്പോർട്ടുകളുണ്ട്.

ജനുവരി 8 മുതൽ മൊബൈൽ-ഇന്റർനെറ്റ് സേവനങ്ങൾക്ക് വ്യാപക നിയന്ത്രണങ്ങൾ ഏർപ്പെടുത്തിയതോടെ രാജ്യത്തെ ആശയവിനിമയം ഗുരുതരമായി ബാധിച്ചു.
ഇറാനിലേക്കും ഇറാനിൽ നിന്നുമുള്ള അന്താരാഷ്ട്ര വിമാന സർവീസുകൾക്ക് വലിയ തടസ്സങ്ങളാണ് നേരിടുന്നത്. യുഎഇ ആസ്ഥാനമായ വിമാന കമ്പനികളെയാണ് ഏറ്റവും കൂടുതൽ ബാധിച്ചത്. ഫ്ലൈദുബൈ ജനുവരി 9ന് തെഹ്റാൻ, ഷിറാസ്, മഷ്ഹദ്, ബന്ദർ അബ്ബാസ് എന്നിവിടങ്ങളിലേക്കുള്ള എല്ലാ സർവീസുകളും റദ്ദാക്കി. എമിറേറ്റ്സ് തെഹ്റാനിലേക്കും മറ്റ് ചില ലക്ഷ്യസ്ഥാനങ്ങളിലേക്കും ഉള്ള നിരവധി സർവീസുകൾ നിർത്തിവെച്ചപ്പോൾ, എതിഹാദ് എയർവേയ്സും ഇറാനിലേക്കുള്ള വിമാനങ്ങൾ താൽക്കാലികമായി റദ്ദാക്കി.
ഖത്തർ എയർവേയ്സ് ദോഹ–തെഹ്റാൻ സർവീസുകൾ റദ്ദാക്കി. ടർക്കിഷ് എയർലൈൻസും അതിന്റെ സഹസ്ഥാപനങ്ങളായ എജെറ്റ്, പെഗസസ് എയർലൈൻസ് എന്നിവയും തെഹ്റാൻ, തബ്രിസ്, മഷ്ഹദ്, ഇസ്ഫഹാൻ, ഷിറാസ് തുടങ്ങിയ നഗരങ്ങളിലേക്കുള്ള ഡസനോളം വിമാനങ്ങൾ റദ്ദാക്കുകയോ നിർത്തിവയ്ക്കുകയോ ചെയ്തു. യൂറോപ്പിൽ, ഓസ്ട്രിയൻ എയർലൈൻസ് വിയന്ന–തെഹ്റാൻ ജനുവരി 9ലെ സർവീസ് റദ്ദാക്കി. ലുഫ്താൻസ ഈ മാസം അവസാനത്തോടെ സർവീസുകൾ പുനരാരംഭിക്കാനുള്ള പദ്ധതി പുനഃപരിശോധിക്കുകയാണെന്ന് അറിയിച്ചു.
പ്രാദേശിക സുരക്ഷാ ആശങ്കകളെ തുടർന്ന് ലുഫ്താൻസ നേരത്തെയും തെഹ്റാൻ റൂട്ടിലെ സർവീസ് നിർത്തിവച്ചിരുന്നു. ജനുവരി 16ന് സർവീസ് പുനരാരംഭിക്കാനായിരുന്നു പദ്ധതി, എന്നാൽ പുതിയ സാഹചര്യത്തിൽ അതിന്റെ ഭാവി അനിശ്ചിതമായി.

ഇറാനിലെ ആഭ്യന്തര വിമാനക്കമ്പനികൾ രാജ്യത്തിനുള്ളിൽ സർവീസുകൾ തുടരുന്നുണ്ട്. എന്നാൽ, പ്രശ്നബാധിത ഇല്ല പ്രദേശങ്ങൾക്കടുത്ത് വ്യോമപരിധി നിയന്ത്രണങ്ങൾ ഇറാൻ സിവിൽ ഏവിയേഷൻ ഓർഗനൈസേഷൻ പ്രഖ്യാപിച്ചിട്ടുണ്ട്. നിരവധി രാജ്യങ്ങൾ വിമാനക്കമ്പനികൾക്ക് ഉയർന്ന അപകടസാധ്യതയെക്കുറിച്ച് മുന്നറിയിപ്പ് നൽകിയിട്ടുണ്ട്. അടുത്തിടെ പുറപ്പെടുവിച്ച വിവിധ നോട്ടീസ് ടു എയർ മിഷൻസ് (NOTAMs) പ്രകാരം, രാജ്യത്തിന്റെ പല ഭാഗങ്ങളിലും പ്രതിരോധ നടപടികൾ ശക്തമാക്കിയിട്ടുണ്ടെന്നതും അന്താരാഷ്ട്ര വിമാനയാത്രയെ കൂടുതൽ സങ്കീർണ്ണമാക്കുന്നതുമാണ്.